Daily news
ДЗС без подготвени тимови и механизација, а со опрема од ЈНА, требало да се справува со поплави и пожари, открива директорот Џафероски
Дирекцијата за заштита и спасување од институција за заштита на цивилното општество е претворена во руинирана установа, каде што не функционира ништо. Формирани, но неподготвени тимови, без механизација, распаднат систем на функционирање и опрема од осумдесеттите години, која била донација од ЈНА. Финансискиот извештај покажал дека оваа владина институција е должна 70 милиони денари, а буџетот за капитални инвестиции во последните 10 години е нула денари. Ова е состојбата за која сведочи новиот директор на ДЗС, Аднан Џафероски. Според него, како што вели, фрапантно и недозволиво е обична поплава, како што ја нарече онаа во Стајковци во 2016 година, да однесе 22 живота, а во тоа улога имала Дирекцијата, која ни одблиску не била подготвена за справување со катастрофи.
„Обична поплава во Стајковци во 2016 година однесе животи. Тоа не е феномен, обична поплава е. Феномен е универзумот. Институцијата е рунинирана, неподготвена, без тимови, без механизација, без спороведени обуки“, вели новиот директор Аднан Џафероски на брифинг со новинарите.
Постојните тимови, за кои директорот вели дека биле пред распаѓање, со малку членови, не функционирале, а никогаш не биле спроведувани ниту обуки за справување со катастрофи. Тимовите за брз одговор постоеле само на хартија. Џафероски вели дека во институцијата се прави попис, досега формирал 64 тима, а во идниот период ќе стави акцент и на нивната функционалност на која не се обрнувало внимание од претходниот директор Шабан Салиу.
„Започнавме да ангажираме професионалци од разни специјалности, со што ќе обезбедиме тимови направени според сите стандарди на ЕУ и кои ќе бидат подготвени за ангажирање и во меѓународни мисии. Го формиравме досега непостојниот главен штаб за заштита и справување, соствен од претставници на сите релевантни институции во државата. Овој штаб досега постоел само на хартија“, информира Џафероски.
Новиот директор на ДЗС, Аднан Џафероски, во натамошниот период ќе работи на подобрување на функционалностите на иснтитуцијата, но најави и нови вработувања бидејќи, како што вели, поставувани се кадри што не ги исполнуваат критериумите, а институцијата нема правен сектор.
К. Ландов
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Награда за „Бизнисот на задоволството“ на фестивалот во САД, кој ги откри Спилберг и Џорџ Лукас
Долгометражниот филм „Бизнисот на задоволството“ на Гоце Цветaновски е добитник на наградата „Сребрено реми“ на „Хјустон интернешнал филм фестивал“ (WorldFest-Houston International Film Festival) во САД.
Овој значаен фестивал, кој постои цели 57 години е еден од најстарите во Америка и најстар во светот за независни филмови. Се гордее со тоа што во својата историја им ги доделил првите награди на легендарни режисери како што се Стивен Спилберг, Џорџ Лукас, Анг Ли, браќата Коен, Ридли Скот, Брајан де Палма, Оливер Стоун, Роберт Родригез, Спајк Ли, Дејвид Линч и уште многу други.
„Ова е голем успех. Да бидеш награден во конкуренција од над 4.000 филмови од 70 држави, е признание кое ја потврдува естетската вредност на филмот. Дефинитивно влеговме во убаво друштво, со оглед на тоа кој се’ е добитник на „Реми награда“ во историјата на фестивалот. И’ честитам на целата екипа којашто допринесе за меѓународниот успех на филмот и едвај чекам сите да се собереме повторно и во септември да го претставиме филмот пред македонската публика.“, рече режисерот Гоце Цветановски.
Наградата е деветта по ред на филмските фестивали во светот, а трета во САД, откако претходно „Бизнисот на задоволството“ го доби признанието за најдобар филм на „Риверсајд филм фестивал“ во Калифорнија и за највпечатлив филм во Седона, Аризона.
Улогите ги толкуваат Муса Исуфи, Слаѓана Вујошевиќ, Исмаил Касуми, Дамјан Цветановски, Осман Ахмети, Елени Декидис, Мендим Муртези, Егзона Салиху, Авни Далипи и Катерина Коцевска, а Цветановски го потпишува и сценариото. Продуценти на филмот се Дритон Рамадани, Богдан Јончевски и Гоце Цветановски.
Снимен е со поддршка на Агенцијата за филм.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.