Денеска во СВР Скопје бил извршен службен разговор со Ф.Б. од село Света Петка, скопско. На 21.08.2025 во 14:30 часот на улицата „Васил Ѓорѓов“ во Скопје се случила сообраќајна несреќа помеѓу патничко возило „фолксваген голф“ со скопски регистарски ознаки, кое го управувал тој и електричен тротинет управуван од 13-годишна малолетничка од Скопје, по што со возилото го напуштил местото на настанот.

Во несреќата со тешки телесни повреди се здобила малолетничката додека со телесни повреди нејзината 12-годишна сопатничка, констатирани во Градска општа болница „Св. Наум Охридски“ Скопје.

По целосно документирање на случајот, против него ќе биде поднесена соодветна пријава.

Украинскиот претседател Володимир Зеленски денеска изјави дека Русија прави сè што може за да спречи средба меѓу него и рускиот претседател Владимир Путин и ги повика сојузниците на Украина да воведат нови санкции врз Москва доколку Русија не покаже интерес за мир.

На заедничката прес-конференција со генералниот секретар на НАТО, Марк Руте, во Киев, Зеленски рече дека разговарале за безбедносните гаранции за Украина што би ги понудиле другите земји. Тој рече дека гаранциите треба да бидат слични на Член 5 на НАТО, кој го смета нападот врз една членка на алијансата за напад врз сите.

„Ова е почеток на голем потфат и не е лесно бидејќи гаранциите се состојат од тоа што нашите партнери можат да ѝ дадат на Украина, како и каква треба да биде украинската армија и каде да се најдат можности за да ја одржи својата сила“, рече Зеленски.

„Јасно е дека САД ќе бидат вклучени“
Руте, кој денес го посети Киев, ги повика западните сојузници да обезбедат „силни безбедносни гаранции“ за Украина во случај на мировен договор со Москва за да се спречи уште една руска инвазија. „Силните безбедносни гаранции ќе бидат од суштинско значење и ние работиме на тоа токму сега за да се осигураме дека Русија никогаш повеќе нема да се обиде да заземе ниту еден квадратен километар украинска територија“, рече тој.

Руте рече дека гаранциите доаѓаат во две форми: првата вклучува зајакнување на украинската војска за да се одвратат идните руски напади, а втората се состои од европски и американски безбедносни гаранции.

„Јасно е дека САД ќе бидат вклучени“, рече шефот на НАТО. „Овие безбедносни гаранции мора да функционираат“.

„Русите прават сè што можат за да го спречат одржувањето на состанокот“
Украинскиот лидер ги повика сојузниците да ја принудат Русија во „барем минимално продуктивна позиција“. Зеленски повеќе пати го повика Путин да се сретне со него, а американскиот претседател Доналд Трамп рече дека рускиот претседател се согласил на таков состанок.

„Русите прават сè што можат за да го спречат одржувањето на состанокот“, рече денес Зеленски. „За разлика од Русија, Украина не се плаши од средби со лидерите“.

Лавров: Зеленски рече „не“ на сè

Рускиот министер за надворешни работи Сергеј Лавров рече дека нема агенда за потенцијален самит меѓу рускиот претседател Владимир Путин и неговиот украински колега Володимир Зеленски. Тој го обвини украинскиот претседател дека вели „не“ на сè.

Во разговор за емисија на Ен-би-си, Лавров рече дека Путин јасно ставил до знаење дека е подготвен да се сретне со Зеленски и да разговара за евентуален договор за прекин на војната во Украина, но под услов да има соодветна агенда за таков состанок. А тоа, рече тој, во моментов недостасува.

„Путин е подготвен да се сретне со Зеленски кога агендата ќе биде подготвена за кој било самит. А таа агенда воопшто не е подготвена“, изјави Лавров за Ен-би-си, додавајќи дека затоа засега не е планирана средба.

Рускиот министер за надворешни работи рече дека Русија се согласила да покаже флексибилност по голем број прашања што ги покрена Трамп на самитот САД-Русија минатата недела, но ја обвини Украина дека не покажала иста флексибилност во разговорите со Трамп и европските сојузници што следеа во Вашингтон.

фото: принтскрин

По неколкугодишен прекин, Дојранското Езеро повторно ќе се полни со свежа вода преку хидросистемот „Ѓавато“. Премиерот Христијан Мицкоски денес од самото место најави дека цевките и пумпите на хидросистемот, кои се нефункционални четврта година по ред, најбргу што може ќе бидат санирани и тој повторно целосно ќе биде ставен во функција, а превисоката сметка за струја ќе се намалува со соларни панели.

„Инженери дојдоа на самото место да го скенираат просторот. Ова земјиште е сопственост на Република Македонија и тука практично во догледно време ќе бидат инсталирани соларни панели бидејќи сметките за електрична енергија сега се на ниво од 200 илјади евра месечно, тоа значи 2,5 милиона евра годишно. Со инсталирање на тие сончеви панели и батериски системи проценивме дека инсталираната можност ќе биде приближно два мегавата и четири мегават-часа батериски системи, сметките драматично ќе се намалат. Заштедата ќе биде огромна и средствата што ќе се заштедуваат ќе се користат за одржување на цевководот и за одржување на хидросистемот ‘Ѓавато’, а со тоа ќе се овозможи поголема достапност на вода за земјоделците за наводнување на земјоделските површини“, рече денес премиерот Мицкоски.

Дел од штетите на хидросистемот ќе ги поправи општествено одговорна компанија, чие име премиерот денес не го откри, но рече дека од вкупно десет пумпи што носат вода до резервоарот на „Ѓавато“, функционални се само две, а регистрирани се и пукнатини во цевководот.

Освен поправка на пумпите што ја носат водата до резервоарот, премиерот Мицкоски, во рамките на системското решение за хидросистемот, најави дека ќе ги обноват и пумпите што ја туркаат водата од резервоарот кон езерото.

„Во насока на ова системско пристапување, покрај овие бунари и санација на овие цевководи и пумпи, и пумпите што се потисни и кои ја туркаат водата кон Дојранското Езеро ќе бидат санирани. На следната седница на Владата ќе донесеме одлука фабриката за опрема и делови во склоп на РЕК ‘Битола’ да демонтира две, да ги санира и потоа да ги монтира. Во комуникација со инженерите од РЕК ‘Битола’ добив информација дека во рамките на десет дена од демонтажата до монтажата и тие ќе бидат целосно санирани“, рече премиерот Мицкоски.

Хидросистемот „Ѓавато“ е нефункционален од февруари 2022 година кога поради енергетската криза, Владата одлучи да ги исклучи пумпите за да се избегнат огромни сметки за струја. Министерството за животна средина тогаш објасни дека сметката за струја од еден милион годишно скокнала на 3,9 милиони, кои не може да си ги дозволат. Откога хидросистемот беше исклучен, жителите на Дојран постојано алармираа за нова еколошка катастрофа оти водостојот на езерото видливо опадна по само неколку месеци, а укажуваа и на кражби на пумпите и уништување на цевководите.

Следуваа цела низа состаноци, одлуки, најави за проекти и на централно и на локално ниво, поминаа парламентарните избори, на кои многу се зборуваше и се ветуваше за езерото и за враќање на хидросистемот, но тој остана нефункционален, а во меѓувреме водостојот беше во постојан пад.
Хидросистемот, кој веќе еднаш го спаси Дојранското Езеро од еколошка катастрофа, е дело на владата на ВМРО-ДПМНЕ на чело со Љубчо Георгиевски. По долготрајното празнење на езерото и екстремно нискиот водостој, во 1999 година владата донесе одлука за прогласување елементарна непогода и поведе иницијатива за спас на Дојранското Езеро, во чии рамки во 2001 почна изградбата на хидросистемот за доведување дополнителни количини вода од „Ѓавато“ кај Богданци, а првите количини беа испумпани во 2003 година.