Македонија
Заев се сретна со стипендисти на германска економска програма

Претседателот на Владата на Република Северна Македонија, Зоран Заев, се сретна со стипендисти од нашата држава, од стипендиската програма на Комитетот на германското стопанство за Источна Европа, којашто се реализира во соработка со Фондацијата „Зоран Џинџиќ“, поддржана од германското Сојузно министерство за економска соработка и развој. Стипендистите на програмата беа придружувани од претставничката од економскиот одел на германската амбасада, Марина Серафимовска.
На средбата младите луѓе споделија искуства од нивната работа во компании во Германија и мислења за применливи практики во нашата земја, во бизнис-секторот, образованието, науката, со оглед дека тие денес живеат, учат и работат во државава.
Заеднички е констатирано дека младите луѓе се една од важните движечки сили на општеството и дека е од исклучително значење e мотивацијата на младите луѓе да придонесуваат во развојот на државава. Тоа, како што беше заеднички констатирано, е можно со отворање простор за работа, за реализација на нивните идеи, со поставување стручни кадри на соодветни позиции, со почитување на нивното знаење и иницијативност, како во државните институции, така и од страна на менаџментите на компаниите.
„Владата е силно посветена да ги унапреди можностите за младите луѓе во Република Северна Македонија да ги гледаат перспективите за работа и образување. Тоа го правиме преку насоченоста кон отворањето нови работни места, можностите за инвестирање во стартап-претпријатија, преку фондовите за иновативни идеи, привлекувањето странски инвеститори и можностите за работа во познати големи светски компании, за чиешто инвестирање во земјава се водат разговори. Посветеноста на НАТО и европските интеграции е пред се да ги мотивираме младите луѓе да сакаат да учат и работат во својата земја“, рече премиерот Заев.
На средбата беше истакнато дека се гледа потенцијал кај младите луѓе во Република Северна Македонија, за што говори и бројката од 91 добиена стипендија на млади луѓе од земјава од 2007 година до денес, во рамки на програмата предвидена за земјите од регионов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Катерина Мирчовска именувана за нова директорка на болницата во Кочани

Катерина Мирчовска е именувана за нова директорка на болницата во Кочани, објави директорот на ФЗОМ, Сашо Клековски.
„Силно лидерство за болницата во Кочани!
Вчера за директорка на Општата болница Кочани е именувана Катерина Мирчовска, хирург. Веста помина штуро, со појаснување дека тоа е на барање на повредените од трагедијата за Кочани.
Катерина ја запознав низ работата за повредените од трагедијата во Кочани. Импресионира на прв впечаток. Полна со енергија, посветена, професионална, со големо срце, ги знае во детали сите најразлични потреби на повредените. Катерина се откажа од својот трансфер во ГОБ 8 септември Скопје за да се посвети на повредените“, објави Клековски на „Фејсбук“.
Тој додава дека Катерина е најдобар можен избор за водење на болницата во периодот на опоравување на повредените и ветува силно лидерство за болницата во овој критичен период.
Македонија
Меџити во Украина: Силно ја осудуваме руската агресија и бараме итно запирање на војната

Првиот вицепремиер и министер за животна средина и просторно планирање на Република Северна Македонија, Изет Меџити, денес учествуваше на Самитот „Украина – Југоисточна Европа“ што се одржа во Одеса, Украина.
Самитот, кој беше отворен од претседателот на Украина, Володимир Зеленски, претставува продолжение на претходните средби одржани во Атина, Тирана и Дубровник, со учество на високи претставници од земјите на Југоисточна Европа. Главната цел на самитот е поддршка за Украина и зајакнување на регионалната соработка и безбедноста.
Во своето обраќање, вицепремиерот Меџити изрази благодарност за гостопримството на украинските власти и ја реафирмираше непоколебливата поддршка од страна на Северна Македонија за суверенитетот и територијалниот интегритет на Украина.
„Обединети сме пред предизвиците кои го загрозуваат мирот, безбедноста и меѓународниот поредок. Силно ја осудуваме руската агресија и бараме итно запирање на војната“, – истакна тој.
Вицепремиерот Меџити ја нагласи и посветеноста на земјата за продлабочена регионална соработка и изградба на безбедна, мирољубива и демократска Европа.
Македонија
ВМРО-ДПМНЕ до Османи: Прво ставивте нож во македонскиот идентитет, а сега дрско сакате да држите лекции за наводен патриотизам

Бујар Османи, министерот кој го прифати францускиот предлог без да трепне, кој го претвори Министерството за надворешни работи во огранок на бугарското МНР и кој ги жртвуваше македонскиот идентитет, јазик и историја за фотосесија со европски бирократи, сега се јавува со патетични морални лекции, велат од ВМРО-ДПМНЕ.
„Ќе беше смешно, ако не беше трагично.
Османи зборува за „внатрешна кохезија“ откако со години активно работеше на нејзино разнебитување.
Тој кој не кажа ни збор кога Бугарија бараше да не постоиме како народ.
Тој кој ја потпиша капитулацијата наречена преговарачка рамка, со наведната глава и без консултација со народот.
Тој што направи параван од „европски вредности“ за да протне асимилација под европско знаме.
Ако некој ја злоупотреби политиката за криминали цели тоа беше ДУИ и Османи, кои држеа говори во кои повикуваа на „света борба за двојазичност”, но како безобразен параван за корупција, кражби и ограбување на сите граѓани: и Македонци, и Албанци, и Турци, Роми Срби, Власи, Бошњаци и останати.
Османи денес зборува за „популизам“ откако целата негова кариера е изградена на клиентелизам, поделби и трговија со националните интереси. И ни збор за тоа што токму тој беше прв што прифати Бугарите да бидат ставени во Уставот, без никаква гаранција за македонскиот народ.
Да му појасниме: Македонија не е ничиј туѓ дом, ама не е ни дом на политичари што ја распродаваат.
Граѓаните не ја заборавија шверцерската ноќ на 16 јули.
Не ја заборавија тишината со која дозволи да се гази врз сè македонско.
Не заборавија дека твојата „дипломатија“ заврши со тоа Македонија да не започне ниту еден кластер, ама затоа добивме бугарски клубови и закани за порекнување на нашето постоење.
Затоа, Османи, подобро молчи.
Историјата ќе те памети како министерот кој го прифати условот македонскиот народ да стане „производ на Коминтерната“. А народот ќе ти го врати со истиот јазик кој најдобро го разбираш“, пишува во соопштението.