Полицијата заплени 19.480 кутии цигари во вредност од околу 40.000 евра во вторник вечер на границата со соседна Бугарија, соопшти министерката за внатрешни работи, Гордана Јанкулоска.

Во рамки на акцијата, уапсени се осум лица од Делчево, Пехчево и Крива Паланка, а уште четири членови на криминалната група која криумчарела цигари се во бегство.

Вчера вечер на државната граница со Бугарија била поставена заседа, по претходни сознанија на полицијата за шверц на цигари. При обидот на полициските службеници да сопрат возило „форд експлорер” со бугарски регистерски таблици, кое се движело во правец на село Панчарево, Делчево, возачот го насочил возилото кон полициските службеници со намера да ги прегази, ја пробил заседата и избегал. Во моментот на пробивање на заседата полицијата пукала, а по половина час потрага возилото било пронајдено откако удрило во дрво покрај патот.

Полицијата нешто подоцна ги пронашла двете лица од возилото, Д.К. (24) од Крива Паланка и В.П. (31) од Пехчево и истите се приведени во полициска станица. Покрај нив уапсен е и организаторот на криминалната група Б.А. (31) од Крива Паланка.

Во возилото биле пронајдени 19.480 кутии цигари без и со акцизна маркица – бандерола, а нивното потекло допрва ќе се утврдува. Вкупната вредност на откриените цигари изнесува 40.000 евра.

Во врска со случајот уапсени се уште пет лица, а уште четири се во бегство. Сите се членови на криминална група која подолго време криумчарела цигари во Бугарија.крај/мф/сд