Во саботата се регистрирани две сообраќајни несреќи во кои учесници се здобиле со тешки телесни повреди, имено 89-годишен велосипедист се здоби со скршеница на колкот во Скопје, а по пад од мопед 31-годишен кумановец е во животна опасност.

Во саботата околу 14,10 часот во Куманово на раскрсницата од улиците.„Доне Божинов“ и „Никола Тесла“ се случила сообраќајна незгода во која 31-годишниот Д.Д. од Куманово, управувајќи мопед „кимко“ со кумановски регистерски ознаки изгубил контрола над мопедот и паднал.

Во незгодата мажот се здобил со тешки телесни повреди, односно фрактура на черепот и повреди на мозокот, и по укажаната лекарска помош во Медицинскиот центар Куманово бил пренесен и задржан на лекување во Клиничкиот центар во Скопје и е во животна опасност.

Увид на местото на настанот извршила увидна екипа од СВР Куманово и се работи на целосно расчистување на случајот.

Исто така, во саботата околу 10,40 часот во Скопје на улицата „Ѓорче Петров“ во сообраќајна несреќа кога 28-годишниот скопјанец С.Б. со возило „форд фиеста“ со скопски регистерски ознаки удрил во велосипедист М.М., на 89 години, исто така од Скопје. Со возило на Брзата помош повредениот старец бил пренесен во Клиничкиот центар Скопје каде му биле констатирани тешки телесни повреди, фрактура на лев колк и е задржан на лекување.

Увид на местото на настанот извршила увидна екипа од СВР-Скопје и се работи на целосно расчистување на случајот./крај/мф/ффс

Извор: Макфакс