Група од пет навивачи на македонската фудбалска репрезентација од Кавадарци во петокот попладне кај поликлиниката Бит пазар била нападната од поголема група засега непознати лица.

Во петокот, околу 17 часот на часот на булеварот „Крсте Мисирков“ во близина на Поликлиниката „Бит пазар“ кога петтемина кавадарчани се движеле кон стадионот „Филип Втори Македонски“ на кој во вечерниот термин се одигра фубдалскито меч меѓу Македонија и Хрватска (1:2), им пришла од непознат правец група од 12 до 15 лица претежно на нивна возраст до 35 години, и без повод и причина ги нападнале со удирање тупаници, боксови и клоци во пределот на главата и телото.

Од нападот кавадарчаните се здобиле со видливи повреди, но по прегледот во скопскиот Ургентен центар сите биле пуштени на домашно лекување.

Инаку, според податоците на скопската полиција мечот од квалификациите за Светското првенство во 2014 година во Бразил меѓу селекциите на Македонија и Хрватска минал без посериозни инцидент.

Вкупно четворица скопјани заработија прекршочни пријави за реметење на јавниот ред и мир и спречување на спортски натпревар, од кои двајца поради расправија за местата за следење на мечот, а другите поради расправија за време на натпреварот.

Организацијата на натпреварот во петокот навечер во Скопје, од аспект на Министерството за внатрешни работи мина мирно и пред, за време и по одржувањето на натпреварот не се регистрирани поголеми и посериозни инциденти меѓу навивачите на двете репрезентации, иако на трибините на скопската фудбалска арена присуствуваа меѓу 700 и 800 навивачи од Хрватска.

За натпреварот, инаку, беа преземени засилени мерки на обезбедување, што се состоеја во превентивно „покривање“ и опсервирање, како пред почетокот на натпреварот, така и по завршувањето на натпреварот, на централното градско подрачје, местата и улиците каде пристигнаа и по кои се движеа навивачките групи од Хрватска и Македонија./крај/мф/сн