Вработен во „Градски гробишта“ Охрид крадел пари од граѓаните кои купувале гробни места. Против него е поднесена кривична пријава за „фалсификување на службена исправа“„злоупотреба на службена положба и овластување“ и „комјутерска измама“.

Во периодот од 24 ноември 2011 до 11 јануари 2013 година, охриѓанецот кој работел  како јавен службеник задолжен за доделување и наплата на гробни места во „Градски гробишта“ Охрид, свесно противправно присвоил пари доверени во службата од наплата на гробни места од тринаесет граѓани во вкупен износ од 352.153,оо денари. На сите тринесет лица кои купиле гробни места им изготвувал писмени  договори за купување, а примероците кои им ги издавал на странките, ги заверил со лажни потписи во делот кој се заверува со потпис од страна на директорот на јавното претпријатие. За да не бидат откриени фалсификатите, примероците од овие спорни договори кои требало да се предадат во службите на јавното претпријатие, биле уништени и ги нема ниту во сметководство на ова претпријатие, ниту во архивата од договорите.Службеникот успеал да наведе неколку граѓани да купат гробно место, составувал писмена изјава за промена на носител на право на употреба на гробно место и во комјутерската евиденција на „Градски гробишта“ внесувал нови лица како старатели без да постои соодветен писмен договор или друг правен основ за стекнување со права на конкретното гробно место. Тој, примил пари во готово и со свој ракопис составил писмена потврда која заедно со примените пари никогаш не ги предал во службата. Парите за наведеното гробно место ги присвојувал и врз основа на лажна изјава вршел промена на податоците во комјутерскиот систем, го бришел старателот-сопственикот на конкретното гробно место и на негово место внесувал други лица-сопственици.  /крај/мф