Регион
Повеќето Грци ја поддржуваат владата во преговорите со доверителите
Повеќето Грци ја поддржуваат својата влада предводена од коалицијата на радикалната левица Сириза во преговорите со доверителите ЕУ и ММФ, посакувајќи сепак договор кој ќе овозможи останување на земјата во еврозоната, се заклучува од анкетата објавена во неделата.
Истражувањето на јавното мнение го спровел институтот Public Issue за дневниот весник Avgi (Зора), близок на владејачката Сириза, и покажува дека 54 отсто од испитаниците одобруваат на кој начин владата ги води преговорите, и покрај тензиите со меѓународните кредитори во коишто Атина не смее да попушти, како што сметаат 59 од испитаниците. Дури 89 отсто се противат на намалувањето на пензиите, а 81 проценти се против колективното отпуштање на работниците.
Уште од август 2014 година Грција ја очекува уплатата од доверителите на траншата од 7,2 милијарди евра од вкупниот пакет помош од 240 милијарди евра, а е дел од вториот пакет помош кој истекува кон крајот на мај. Европската унија и Меѓународниот монетарен фонд бараат спроведување на реформите во замена за помош, во прв ред реформа на пазарот на трудот.
Тие реформи се дијаметрално спротивни на предизборните ветувања на премиерот Алексис Ципрас. Тој во саботата повтори дека неговата влада нема да попушти пред „неразумните барања“ кои се во спротивност со „црвените линии“ поставени во кампањата“.
Доколку не се договори со доверителите, Грција нема да може да ги исполни преземените обврски, бидејќи меѓу 5-ти и 19-ти јуни ѝ доаѓа за наплата ратата од 1,5 милијарди евра од долгот кон ММФ. Неисполнувањето на обврската би можело да ја принуди Грција да излезе од еврозоната.
Според резултатите од споменатата анкета, 71 отсто од испитаниците ја поддржуваат заедничката европската валута, а 68 проценти мислат дека враќањето на драхмата само би ја влошило ситуацијата во земјата./крај/мф/сн
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Регион
(Видео) Невремето во Србија направи хаос: се излеа Дунав, ветерот корне дрвја
Реката Дунав денеска се излеа во Бачка Паланка, во природниот парк „Тиквара“, додека на северот од Србија е забележан значителен пад на температурата и се предвидува невреме пропратено со врнежи и грмежи.
Имено, како што може да се види на видеата на социјалните мрежи, водата достигна такво ниво што од водата штрчат само чадори и улични светилки.
Како што соопшти денеска Републичкиот хидрометеоролошки завод на Србија (РХМЗ), облачност со врнежи од дожд, пад на температурата и умерен и засилен северозападен ветер најпрвин ја зафати Бачка Паланка, но потоа ќе се прошири и во остатокот од Војводина.
Студениот бран преку северот на земјата пристигна во Србија, каде во некои градови температурата беше околу 15 степени.
На граѓаните им се препорачува да ги преземат сите мерки за заштита на имотот, но и себеси поради предвиденото невреме.
Значителна промена на времето утре ќе има и во Македонија, најави Управа за хидрометеоролошки работи (УХМР).
Утре под влијание на влажна и постудена воздушна маса од север ќе настапи позначителна промена на времето. Од утринските часови најпрвин во северните делови, ќе има повремени врнежи од дожд и локална појава на грмежи. Ќе дува силен ветер (наместа над 70км/ч.) кој ќе продолжи и во понеделник.
ИЗВОР: УХМР
Дневната температура значително ќе се намали (утре за 6 до 8, а во понеделник уште за дополнителни 4 до 6 степени). Потоа во следните два дена времето ќе биде сончево со ниски утрински температури, а дневните ќе бидат во пораст.
Во Скопје, утре ќе има повремени врнежи од дожд, локално со појава на ретки грмежи и силен ветер.
Од четврток се очекуваат нови врнежи од дожд.
Регион
Силен земјотрес во Грција
Земјотрес со јачина од 4,6 степени според Рихтеровата скала ја погоди јужна Грција, објави ЕМСЦ.
Земјотресот е регистриран на 44 километри од Пиргос, на длабочина од 20 километри.
Во близина е островот Закинтос.
Засега нема информации за повредени или материјална штета.
#Earthquake (#σεισμός) confirmed by seismic data.⚠Preliminary info: M4.6 || 41 km S of #Pýrgos (#Greece) || 3 min ago (local time 15:18:15). Follow the thread for the updates👇 pic.twitter.com/7n5aGlNhsu
— EMSC (@LastQuake) September 28, 2024
Регион
(Видео) Невреме во Словенија: по обилните дождови се излеа река, поплавени патишта, подруми и ниви
Реката Соча и нејзините притоки на запад од Словенија се излеаjа по обилните дождови во областа Бовец и поплавија патишта, подруми и ниви, јавија денеска словенечките медиуми.
Противпожарните служби евакуирале 30 лица откако одрон го блокирал патот во градот Лепена, јавува агенцијата СТА.
Едно лице е повредено при отстранување на паднато дрво во општина Толмин.
Дирекцијата за цивилна заштита и помош при катастрофи соопшти дека пожарникарите цела ноќ ја испумпувале водата од подрумите и ги отстранувале паднатите дрвја од коловозите.
Во западните делови на земјата врнежите се ослабени од четвртокот навечер, а невремето денеска го зафати и источниот дел на Словенија.
Најголемо количество врнежи се регистрирани во Бохињ и Посочје, објави порталот Метеоинфо.
Рекордни врнежи за Словенија се забележани во Вогел кај езерото Бохињ, при што за 24 часа наврнале 378 литри дожд на метар квадратен.