Тепачките од автобусите, се преселија на улиците. Петмина скопјани, меѓу кои и една жена викендов биле нападнати во Скопје соопшти МВР.

Првиот напад се случил завчера околу 00,40 часот на улица „Владимир Комаров“ во скопската населба „Аеродром“. Четири лица на возраст од 16 до 20 години без повод и причина нападнале двајца скопјани на возраст од 44 и 34 години.

Напаѓачите почнале да ги маваат двајцата скопјани со дрвени предмети и метална шипка по телата. Повредени биле пренесени во Ургентниот центар во Скопје каде им биле констатирани телесни повреди. За кратко време биле пуштени на домашно лекување.

Вториот напад се случил вчера рано наутро околу 6,30 часот на автобуската за приградски линии во Транспортен центар под железничката станица.  Две до три непознати лица нападнале четириесет и тригодишна жена, удирајќија со тупаници по тилот.

Жената паднала на земја, а напаѓачите продолжиле да ја удираат со клоци во главата и телото. Жената со црвенило и оток на десното око заминала дома, а во 22 часот на инсистирање на нејзиниот брат побарала лекарска помош во Ургентниот центар.

Третиот напад се случил вчера околу 12,40 часот на улица „Христијан Тодоровски Карпош кај фонтаната наспроти супермаркетот „Веро“ во населба „Чаир“. Додека дваесет и четиригодишно момче се шетал со шеснаесетгодишен другар биле нападнати со тупаници и клоци по главата и телото од непознато лице на возраст од 25 години. Од Министерството за внатрешни работи соопштуваат дека напаѓачот бил од албанска националност.

Двајцата другари почнале да бегаат низ паркот кон зградата на општина „Чаир“, но напаѓачот ги стигнал и повторно почнал да ги удира, по што избегал.

Едниот од нив се здобил со повреда на левото колено и болки на главата-вратот, другиот имал болки во пределот на десното уво и левото колено, како и гребнатина на десниот показалец.

Полицијата работи на расчистување на случаите./крај/мвр/фф