Daily news
Научниците открија зошто витаминот Б12 предизвикува воспаление на кожата
Зголеменото ниво на витаминот Б12 во крвниот серум предизвикува бактериите, кои живеат на кожата, да го намалат неговото производство и наместо тоа произведуваат материи кои предизвикуваа воспаление, се заклучува во студијата објавена во списанието Science Translational Medicine.
Витаминот Б12 го создаваат бактерии во човековиот организам, а исто така се внесува и преку храната. Познато е дека суплементацијата на овој витамин предизвикува појави на акни, но сепак зошто тоа се случува сé уште не е познато.
„Нашето истражување покажа дека витаминот Б12 ја менува активноста на генот на микроорганизмите кои живеат на кожата, и доведуваат до развој на акни кај одредени групи луѓе. Нашата работа не само што го појаснува одамна познатата поврзаност меѓу високото ниво на витамин Б12 и развојот на акните, туку и го покажува молекуларниот механизам на развојот на болеста“, пишува во студијата Хојин Ли од Калифорнискиот универзитет во Лос Анџелес.
Во младоста од акни патат 80 отсто од луѓето. Мозолчињата се јавуваат поради воспалување на клетките во фоликулите на влакната, каде што се наоѓа коренот на влакната и лојните жлезди. Механизмот на оваа појава целосно не е сосема познат, но се верува дека важна улога игра притоа бактеријата Propionibacterium acnes.
Оваа бактерија ја има во големо количество на човековата кожа, како кај оние кои патат од појавата на акни, така и кај здравите. За да објаснат во што се состои разликата кај нив, Ли и нејзините колеги ги разгледувале содржините на фоликулите кај четворица пациенти и пет здрави волонтери и ја анализирале активноста на гените во најдениот материјал на бактеријата Propionibacterium acnes. Кај здравите и болните испитаници, таа била различна. Натаму научниците им посветиле внимание на овие гени, чии активности видно се разликувале. Се покажало дека кај бактериите, добиени од луѓето кои страдале од мозолчиња, било намалено нивото на активноста на гените кои се вклучени во биосинтезата на витаминот Б12. Овој резултат научниците го потврдиле и на дополнителниот примерок од 9 пациенти со акни и 15 здрави доброволци.
Познато е дека нивото на витаминот Б12 влијае врз неговата биосинтеза во организмот. За да се провери како зголеменото ниво на витаминот влијае врз животната активност на бактеријата Propionibacterium acnes, научниците интрамускуларно кај 10 од 15 здрави испитаници инјектирале 1 мл хидроксикобаламин, форма на витаминот Б12, кој се користи во витаминските препарати. Таквата инјекција за неколку пати го зголемува нивото на витаминот Б12 во серумот на крвта, и нејзиниот ефект трае најмалку две седмици. Две седмици подоцна, научниците откриле дека активноста на гените на бактеријата Propionibacterium acnes, поврзана со синтезата на витаминот се намалила, и оти нејзиното ниво е слично на она забележано кај испитаниците кои страдале од акни. Покрај тоа, кај еден од доброволците се појавиле мозолчиња. Научниците, исто така, појасниле дека намалувањето на создавањето на витаминот Б12 од бактериите доведува до хиперпродукција на порфирините, кои предизвикуваат воспаление кај фоликулите.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Daily news
Прва правна конференција Tres Partes
На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната
Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера
Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.