Македонија
Во среда уште еден обид да се конституира комисијата за избирачкиот список
Конститутивна седница на Привремената комисија за прочистување на избирачкиот список денеска е прекината бидејќи не се појавија членовите од опозицијата и претседателот на комисијата, Цветанка Иванова од СДСМ.
Конститутивна седница на Привремената комисија за прочистување на избирачкиот список денеска е прекината бидејќи не се појавија членовите од опозицијата и претседателот на комисијата, Цветанка Иванова од СДСМ.
Седница на комисијата има право да закаже претседателот, но бидејќи Иванова не го стори тоа, според Деловникот за работа на Собранието, истата ја закажа собранискиот спикер Трајко Вељаноски.
Силвана Бонева од ВМРО-ДПМНЕ, која е член на комисијата, информираше дека комисијата ќе продолжи со работа во среда и изрази надеж дека на седницата ќе присуствуваат и членовите и претседателот од редовите на опозицијата.
„Одлуката која што ја донесовме во Собранието на Република Македонија да основаме привремена Комисија за утврдување на состојбата со избирачкиот список е барање на колегите од опозицијата предводена од СДСМ. Самиот факт што колегите од опозицијата не се тука, ние ја прекинавме работата на седницата ќе продолжиме во среда и очекуваме да се вратат, доколку искрено сакаат да имаме предвремени избори со јасно утврдени правила“, образложи Бонева.
Според неа опозицијата треба да стои на своите барања, доколку искрено сака фер и демократски избори.
Од ДУИ пак велат дека комисијата е со цел да се излезе од моменталната политичка ситуација и дека опозицијата може да смени некој од нивните членови или претседателот, доколку тоа го сака.
„Со одлука на Собранието имаме претседател на оваа комисија, кој припаѓа на опозицијата и секако дека доколку сакаат да го сменат претседателот или некој член од нивните редови, опозицијата може да го направи тоа“, изјави Тахир Хани од ДУИ.
Непотребна провокација од страна на ВМРО-ДПМНЕ, вака пратеничката Роза Топузова Каревска го оцени закажувањето на конститутивната седница.
„.Ако вчера на лидерската средба се говорело дека ќе се формира Комисијата, каде што ќе учествуваат членови од сите политички партии и тие самите да одлучат кои ќе бидат нивни членови, не знам по кој основ сум јас член и како се најдов на таа листа, бидејќи ЛДП не достави предлог. Уредно ни беше доставено писмено барање да предложиме член и на ист начин одговоривме дека нема да учествуваме во тоа. ЛДП не сака да биде дел од вака формирана комисија за утврдување на состојбата со избирачкиот список“, изјави Роза Топузова – Каревска од ЛДП.
Од Нова демократија сметаат дека парламентарното мнозинство ја злоупотребува создадената атмосфера.
„Нова Демократија нема да учествува во работата на Комисијата затоа што сметаме дека парламентарното мнозинство ја злоупотребува создадената атмосфера и истовремено започнатите преговори меѓу лидерите на поголемите политички партии. Доколку синоќа се постигна мал прогрес, тоа не значи дека е постигнат краен политички договор“, изјави Флора Кадриу од НД.
Комисијата при својата работа за утврдување на состојбите со избирачкиот список може да соработува со ДИК и други надлежни органи, со домашни здруженија и меѓународни организации./крај/бд
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Одлуки за учество на припадници на Армијата на вежби во Германија, Бугарија, Косово
Владата на денешната седница донесе и повеќе одлуки на предлог на Министерството за одбрана, меѓу кои и за испраќање на припадници на Армијата на Република Северна Македонија за учество на вежбата „BEYOND HORIZON 24“, во Република Бугарија, за испраќање на припадници на Армијата на Република Северна Македонија за учество во НАТО операцијата „КФОР“ во Република Косово и за испраќање на припадници на Армијата на Република Северна Македонија за учество на вежбата „Combined Resolve 24-2“ во Сојузна Република Германија.
Македонија
Личните документи ќе можат да се подигнат и в среда, извести МВР
Во пресрет на претстојните Претседателски и Парламентарни избори што ќе се одржат утре, Министерството за внатрешни работи ги известува граѓаните дека Одделот за граѓански работи, односно сите отсеци за управни работи на оваа организациона единица при МВР на 08.05.2024 ќе работат за издавање на лични документи со работно време од 08.00 до 19.00 часот.
„Исто така ги известуваме граѓаните дека сите барања за лични карти кои се поднесени до 03.05.2024 година, се веќе изготвени и граѓаните можат да ги подигнат“, соопшти МВР.
Македонија
Пронајдени три полуавтоматски пиштоли и 139 куршуми, ОЈО Велес отвори истрага за недозволено држење оружје
Основното јавно обвинителство Велес донесе Наредба за спроведување истражна постапка против едно лице за кривично дело – Неовластено изработување, држење, посредување и тргување со оружје или експлозивни материи од член 396 став 5 во врска со став 3 на Кривичниот законик.
„При претрес во домот на осомничениот во селото Мелница, општина Чашка, полицијата пронашла поголемо количество оружје и муниција – три полуавтоматски пиштоли и 139 куршуми со различен калибар. За осомничениот поднесен е предлог за определување мерка притвор“, соопшти Обвинителството.
ОЈО Велес продолжува да постапува и да презема дејствија за проверка на сомненијата за изборен поткуп во однос на овој осомничен и на уште едно лице во велешко кај кое во текот на вчерашниот ден беа извршени претреси, се додава во соопштението.