Uncategorized
НОМАД Танц Академија низ Балканот
„Локомотива – центарот за нови иницијативи во уметноста и културата“ од Скопје ги започна своите активности за оваа година
„Локомотива“ втора година продолжува со меѓународниот проект за развој на современиот танц во регионот – НОМАД Танц Академија. НОМАД Танц Академијата е тригодишен проект кој има едукативна и истражувачка програма, како и програма за презентација и развој на публика. За сите програми секоја година има отворен конкурс за студенти, истражувачи и уметници кои се стипендирани. НОМАД Танц Академија е прва сериозна институционализирана регионална програма која се однесува на афирмација и професионализација на современиот танц на Балканот. Едукативната програма на оваа академија започна во Сараево на 27 февруари оваа година. Тринаесет студенти од регионот и пошироко во период од 4 месеци ќе патуваат, живеат, учат и создаваат заедно. По Сараево, едукативната програма продолжува во Скопје, Софија, Белград, Кањижа, Загреб и Љубљана. Втората генерација студенти пристигнуваат во Скопје на 14 март (сабота) да ја проследат едукативната програма која ќе трае до 31 март и е составена од предавања, работилници и отворени дискусии. Часовите и теоретскиот дел ќе се одвиваат во ДМБУЦ „Илија Николовски – Луј“ и во Културниот центар „Точка“, каде што уметниците низ отворен пристап ќе стекнат база и контакти за идна интернационална соработка, што е една од целите на Академијата. Оваа генерација на НОМАД Танц Академија ја сочинуваат 13 танчери, кореографи и актери од регионот со кои во Скопје ќе работат истакнати кореографи, теоретичари, режисери, како Јасмина Пролиќ од Франција/Босна и Херцеговина, Соња Здравкова – Џепаровска и Деан Дамјановски од Македонија, Рок Вевар од Словенија и Изабел Шад од Германија. Со програмата на НОМАД ќе се подобри и поттикне размената, учењето и креацијата во доменот на современиот танц во регионот преку програма на интердисциплинарни работилници, предавања, студентски посети и средби со уметници и теоретичари од сите земји учеснички.Програмата комплетно ќе се заокружи на 20 и 21 јуни во Љубљана, со организирање на презентации од студентите придружени со конференција на НОМАД Танц Академија, партнерите и нејзините соработници. Оваа академија е дел од активностите на европскиот проект Jardin d’ Europe и е поддржана од Швајцарската културна програма, Култура 2007 – 2013, Европска културна фондација, КултурКонтакт Австрија, Гете Институт и Министерство за култура на Република Македонија.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Uncategorized
Мицкоски на средба со австрискиот амбасадор Памер: Идната влада ќе работи на уште позасилена соработка на економско поле помеѓу двете држави
Претседателот на ВМРО-ДПМНЕ, Христијан Мицкоски, заедно со потпретседателот Тимчо Муцунски денеска оствари средба со австрискиот амбасадор Мартин Памер.
Мицкоски му се заблагодари на Памер за поддршката што Македонија ја добива од Австрија на патот на евроинтеграциите.
Одличните односи помеѓу Македонија и Австрија на економско поле ќе бидат дополнително унапредувани и поттикнувано во наредниот период, истакна Мицкоски.
Воедно, беше потенциран и планот за борбата против корупцијата и криминалот, кои ќе бидат високо на агендата на идната влада.
Uncategorized
Силен земјотрес ја погоди Франција
Франција денеска ја погоди земјотрес со јачина од 4,1 степени според Рихтеровата скала, соопшти Европско-медитеранскиот сеизмолошки центар (EMSC).
Епицентарот на земјотресот бил на 10 километри југоисточно од градот Тарбес и 120 километри југозападно од Тулуз, на длабочина од четири километри, се наведува на веб-страницата ЕМСЦ.
Засега нема информации за повредени или материјална штета.
Uncategorized
Сончево и топло со мала до умерена облачност, попладне нестабилно време со пороен дожд и грмежи
Сончево и топло со мала до умерена облачност. Ќе дува слаб до умерен ветер од јужен правец. Попладне наместа, особено во северните делови ќе биде нестабилно со пороен дожд и грмежи, а ќе има и услови за краткотрајно невреме со силен ветер и изолирана појава на град. Минималната температура ќе биде во интервал од 7 до 14, а максималната ќе достигне од 24 до 29 степени.
Во Скопје сончево и топло со мала до умерена облачност. Попладне во делови од котлината ќе биде нестабилно со пороен дожд и грмежи, а ќе има и услови за краткотрајно невреме. Минималната температура ќе се спушти до 10, а максималната ќе достигне до 27 степени.
Во следните денови ќе се задржи топло време, но во попладневните часови наместа ќе биде нестабилно со пороен дожд и грмежи. Локално ќе има услови процесите да бидат поинтензивни во форма на краткотрајно невреме, со силен ветер, интензивен пороен дожд и изолирана појава на град.