Надворешна политика
Попоски-Заоралек: Што поскоро решавање на внатрешно-политичката криза за напредок во евроинтеграциите
Решавањето на бегалската криза, внатрешно-политичката состојба во Македонија и евроинтеграциите беа во фокусот на разговорите помеѓу министерот за надворешни работи Никола Попоски и неговиот чешки колега Лубомир Заоралек во средата во Скопје. Министрите согласни дека двете земји имаат одлични односи на политички план, со простор за унапредување на економски план.
Во однос на најгорливото европско прашање во моментов, односно бегалската криза, Попоски порача дека земјата во пракса го почитува она што е договорено, а тоа е значително намалување на протокот на нелегалните мигранти и воспоставување на систем за контрола и регистрација на пристигнатите мигранти.
„Македонија покажа во пракса дека може да го почитува тоа што е договорено, значително го намаливме протокот на нелегални мигранти, воспоставивме систем на контрола и регистрација и спроведување на сите оние коишто се основани баратели на азил во ЕУ на еден хуман и безбеден начин. Значајна беше помошта која што на билатерално ниво ја добивме од повеќе членки на ЕУ, вклучително и Чешка, која несебично придонесува и со присуство на сили и со опрема за да можеме да ја реализираме контролата на границата и ефикасниот систем на регистрација. Тоа што е договорено на европско ниво треба да се имплементира, и во делот на помошта за Турција да се справи со бегалците на нејзина територија и во делот на контролата на надворешните граници на ЕУ односно таму каде што влегуваат бегалците а тоа во Грција. Македонски интерес е да имаме соработк со Грција, да нема еднострани решенија и сите заедно да дејствуваме во правец на контрола и безбеден и хуман третман на бегалците и азилобарателите во европските земји“, порача Попоски.
Шефот на македонската дипломатија исто така се осврна и на политичката криза, порачувајќи дека заеднички заклучок е дека „што поскоро треба да заврши деструктивниот циклус на политичкото конфронтирање внатре во земјата“.
„Политичкото конфронтирање внатре во државата е добар изговор за секој оној кој би можел да посака да продолжи одложувањето на потребниот почеток на пристапните преговори за членството во ЕУ. Што поскоро треба да бидат исполнети точките коишто беа договорени од страна на партиите вклучително и организирањето на изборите на 24-ти април, со што потоа целата енергија ќе биде насочена кон тоа ЕУ и нејзините членки конечно да ја донесат одлуката којашто шест години се одложува, а тоа е почетокот на пристапните преговори“, рече Попоски.
Од страна на чешкиот министер Заоралек беше потенцирано дека состојбата во Македонија е проблем и за Европската унија, и дека како земја членка, Чешка посакува што поскоро решавање на сите присутни проблеми, вклучително и навремено одржување на закажаните избори.
„Ставот на Чешка останува непроменет, како за европските интеграции, така и за интеграцијата во НАТО. Сакаме да помогнеме во сегашната неповолна ситуација во која се наоѓа Македонија, нас нѐ вознемири ситуација со внатрешно-политичката криза, особено во деловите на владеењето на правото и слободата на медиумите и овие проблеми треба да се решат што е можно поскоро. Времето во кое живееме не е време на двоумење и треба одговорно да пристапиме кон решавање на оваа внатрешно-политичка ситуација. Треба навремено да се одржат изборите и земјата да добие претставници кои се способни да ги решаваат проблемите не само што ги има Македонија, туку и ЕУ. Чешка има искуство со решавањето на проблемите во интеграцискиот процес, но потребен е партнер којшто може со нас да разговара и да ги решава проблемите“, порача Заоралек.
Чешкиот гостин исто така додаде дека во однос на мигрантската криза, Чешка ќе продолжи со помошта за Македонија во решавањето на овој проблем.
„Разговаравме и за мигрантската криза, Чешка помага не само хуманитарно туку испрати и 27 полицајци кои делуваат на границата. Подготвени сме на понатамошно продлабочување на соработката и нови можности за помош, бидјеќи сакаме да бидеме активен учесник во решавањето на овој проблем. Сакаме да помогнеме Македонија да не стане камп каде што би се задржале сите бегалци и дојдовме тука да соработуваме и да помогнеме во решавањето на овој проблем“, додаде тој.
Заоралек, во име на Вишеградската група, составена од Чешка, Словачка, Полска и Унгарија, го поздрави и формирањето на фондот за западен Балкан, направен врз основа на вишеградскиот фонд, а во кој активно ќе учествува и Македонија./крај/мф/бс
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Средба на претседателите на Собранијата на Македонија и Украина, Митрески и Стефанчук
Претседателот на Собранието на Република Северна Македонија, Јован Митрески, во рамките на посетата на Киев по повод втората годишнина од почетокот на руската воена агресија врз Украина, оствари средба со претседателот на Врховната рада на Украина, Руслан Стефанчук.
Претседателот Митрески изрази благодарност за поканата и нагласи дека посетата претставува потврда на цврстата и непоколеблива поддршка на Република Северна Македонија за Украина, на сите полиња. Тој нагласи дека уште од самиот почеток силно ја осудуваме руската агресија против Украина, континуирано ја потврдуваме нашата поддршка за украинскиот територијален интегритет, суверенитет и целовитост и изразуваме целосна поддршка на правото на самоодбрана на земјата.
Претседателот на Собранието истакна дека Северна Македонија целосно се приклучи на сите рестриктивни мерки и санкции на ЕУ кон Руската Федерација, ко-спонзорираше бројни резолуции и иницијативи во однос на Украина, а упати и воена и хуманитарна помош за земјата.
Македонија
Средба Османи – Кулеба во ОН Њујорк: Европската Унија е наша заедничка иднина
Министерот за надворешни работи, Бујар Османи, на 23 февруари 2024 година, оствари средба со министерот за надворешни работи на Украина, Дмитро Кулеба, во седиштето на Обединетите нации во Њујорк, на маргините на 56. пленарен состанок на 78. седница на Генералното Собрание.
Средбата се одржа со цел да се даде поддршка на Украина на денот на одбележувањето на две-годишнината од почетокот на руската агресија во Украина, при што Османи потенцира дека е многу важно да продолжи поддршката на Украина, бидејќи ако Русија победи во Украина, тогаш ние сме следните.
Министерот Османи, на средбата, истакна дека денес Руската Федерација е најголемата закана за безбедноста на Европа, на Западен Балкан, но и на Република Северна Македонија.
“Важно е да имаме стратешка предвидливост во нашата држава, со цел конечно да кажеме “Не” за Русија и “Да” за интегративните европски процеси на Западниот Балкан и на Република Северна Македонија”, рече Османи.
Додека, Министерот Кулеба, истакнувајќи го фактот дека Северна Македонија цврсто застана зад Украина во текот на двете години агресија, упати благодарност до граѓаните на Северна Македонија, како и благодарност до Министерот Османи за неговото лидерство и поддршка.
“Нашата иднина е заедничка, таа иднина е Европската Унија, која воедно претставува и иднина за мир и просперитет, рече Кулеба.
Двајцата Министри имаа свои обраќња пред Генералното собрание на Обединетите нации, каде упатија јасни пораки против рускат агресија врз Украина.
Македонија
(Видео) Oсмани од ОН во Њујорк: Мораме да и кажеме не на Русија
Министерот за надворешни работи, Бујар Османи, денес се обрати од седиштето на Обединетите нации во Њујорк, на 56. пленарен состанок на 78-та седница на Генералното собрание, по повод две години од инвазијата на Русија врз Украина, кој се одржа на тема: Ситуацијата во привремено окупираните територии на Украина.
Османи, уште еднаш, ја повика Русија да ја прекине оваа бесмислена војна и да ги повлече своите трупи од суверената територија на Украина.
„Русија ги прекрши основните принципи на меѓународното право и започна целосна агресивна војна против Украина, земја членка на ОН’’, истакна Османи.
Воедно, министерот потенцираше дека Северна Македонија е исто така силно загрижена и ја осудува незаконската депортација на децата од Украина во Русија и Белорусија од страна на Руската федерација и ги повика да обезбедат нивно безбедно враќање дома.
„Мораме да и кажеме не на Русија! Правдата и одговорноста мора да надвладеат”, рече Османи, воедно додаде дека Северна Македонија им се придружи на другите 140 земји-членки за поддршка на суверенитетот и територијалниот интегритет на Украина во нејзините меѓународно признати граници од 1991 година.
Османи повика на обединетост во поддршката за Украина, не само за доброто на жртвите и нивните семејства, туку и како предуслови за избегнување на понатамошни агресии и неиспровоцирана употреба на сила во меѓународните односи.