Uncategorized
„Homebound / Macedonia 2007“ – „На пат кон дома / Македонија 2007“ од Васил Боглев
Во издание на Avenue Photos од Сиднеј, Австралија, од печат излезе „Homebound / Macedonia 2007“ – „На пат кон дома / Македонија 2007“, книга со фотографии од Васил Боглев, македонски фотограф кој живее и работи во Австралија
Книгата е фотографски запис од престојот на авторот во Македонија во 2007 година. На 248 страници, колку што има книгата, се објавени 168 фотографии снимени на повеќе локалитети низ Македонија кои го претставуваат секојдневието во земјата – нејзините градови и села, улици, згради, негибнатите природни убавини и богатата историја и, пред се‘, нејзините жители, обичните луѓе, кои го носат бремето на тоа секојдневие.Боглев ја претставува земјата и се‘ она што ја дефинира, во едно поинакво светло, својствено на неговиот стил, кој што во многу елементи е посебен и исклучителен. Многу нераскажани, многу скриени и, за многумина, секојдневни приказни, кои останале недокажани, светлото на денот го доживуваат токму преку овие фотографии. Заради елементот на повторување, многу детали од животот остануваат незабележани. Често пати тие детали, и покрај тоа што се дел од севкупната свест, ненамерно се ставаат во втор план за во одреден момент наеднаш да испливаат на површина со сета своја силина.Боглев е документарен и социјален фотограф. Тој е фотограф на улицата, на обичниот, секојдневен и, понекогаш, скриен и невидлив живот. Такви се и фотографиите објавени во оваа книга, кои ја прикажуваат токму таквата реалност – обична, скриена и, понекогаш, не толку убава, но секогаш присутна. Јасно, сето тоа видено со окото на Боглев, кому оваа му е трета книга со фотографии. Претходните две се книги со фотографии од Сиднеј.Васил Боглев е роден во Полска во 1953 година. Дипломира на Архитектонскиот факултет во Скопје. Од 1982 година работеше како новинар во Нова Македонија, а во 1987 година замина за Сиднеј, Австралија. Во Сиднеј неколку години работеше како архитект, а во 1990 година почна да го издава Македонски Глас, неделен весник на македонски јазик, дистрибуиран низ цела Австралија. По 10 години издаваштво, во 2000 година, Боглев и‘ се врати на старата љубов – фотографијата. Учесник е на многубројни изложби, на кои што има добиено високи награди и пофалби. Во 2001 година, на неофицијалниот веб-сајт на светски познатиот часопис за фотографија American Photo, Боглев се најде меѓу неколкумината забележителни светски имиња во фотографијата. Неколку години беше член на Фотографската агенција Newscom од Вашингтон, а во 2006 година ја формира Фото Агенцијата Avenue Photos.Книгата може да се набави преку познатите интернет портали за продажба на книги – Amazon, Barnes & Noble, Betterworld, и други, или преку веб-сајтот на Avenue Photos – www.avenuephotos.com.au/homebound.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Uncategorized
Мицкоски на средба со австрискиот амбасадор Памер: Идната влада ќе работи на уште позасилена соработка на економско поле помеѓу двете држави
Претседателот на ВМРО-ДПМНЕ, Христијан Мицкоски, заедно со потпретседателот Тимчо Муцунски денеска оствари средба со австрискиот амбасадор Мартин Памер.
Мицкоски му се заблагодари на Памер за поддршката што Македонија ја добива од Австрија на патот на евроинтеграциите.
Одличните односи помеѓу Македонија и Австрија на економско поле ќе бидат дополнително унапредувани и поттикнувано во наредниот период, истакна Мицкоски.
Воедно, беше потенциран и планот за борбата против корупцијата и криминалот, кои ќе бидат високо на агендата на идната влада.
Uncategorized
Силен земјотрес ја погоди Франција
Франција денеска ја погоди земјотрес со јачина од 4,1 степени според Рихтеровата скала, соопшти Европско-медитеранскиот сеизмолошки центар (EMSC).
Епицентарот на земјотресот бил на 10 километри југоисточно од градот Тарбес и 120 километри југозападно од Тулуз, на длабочина од четири километри, се наведува на веб-страницата ЕМСЦ.
Засега нема информации за повредени или материјална штета.
Uncategorized
Сончево и топло со мала до умерена облачност, попладне нестабилно време со пороен дожд и грмежи
Сончево и топло со мала до умерена облачност. Ќе дува слаб до умерен ветер од јужен правец. Попладне наместа, особено во северните делови ќе биде нестабилно со пороен дожд и грмежи, а ќе има и услови за краткотрајно невреме со силен ветер и изолирана појава на град. Минималната температура ќе биде во интервал од 7 до 14, а максималната ќе достигне од 24 до 29 степени.
Во Скопје сончево и топло со мала до умерена облачност. Попладне во делови од котлината ќе биде нестабилно со пороен дожд и грмежи, а ќе има и услови за краткотрајно невреме. Минималната температура ќе се спушти до 10, а максималната ќе достигне до 27 степени.
Во следните денови ќе се задржи топло време, но во попладневните часови наместа ќе биде нестабилно со пороен дожд и грмежи. Локално ќе има услови процесите да бидат поинтензивни во форма на краткотрајно невреме, со силен ветер, интензивен пороен дожд и изолирана појава на град.