Околу милион и 400 илјади избирачи од Западниот брег, Појасот Газа и Источен Ерусалим денеска ќе гласаат на парламентарните избори во Палестинската автономија, јавуваат израелските медиуми.

Околу милион и 400 илјади избирачи од Западниот брег, Појасот Газа и Источен Ерусалим денеска ќе гласаат на парламентарните избори во Палестинската автономија, јавуваат израелските медиуми.

Владејачкиот Фатах и исламското движење Хамас ја завршија предизборната кампања со размена на тешки зборови, но и со напомена за можна меѓусебна соработка доколку се остварат предизборните прогнози и никој не освои апсолутно мнозинство.

Според предизборните анкети Хамас и Фатах се изедначени, но, бидејќи на изборите учествуваат и девет помали партии, можно е никој да не освои апсолутно мнозинство, односно 67 од 132 места во Парламентот.

Претставниците на Хамас најавија дека и во случај на победа не сакаат сами да владеат и дека се подготвени на Фатах да му понудат формирање на коалициона влада.

Во евентуалната коалициона влада Хамас, како што е навестено, би ги барал Министерствата за здравство, образование и социјална заштита, додека на Фатах би му ги препуштил контактите со Израел, вклучувајќи ги и мировните преговори.

И покрај најавите за евентуална коалициона влада, Хамас нема намера да се разоружа се додека не заврши израелската окупација.

Доколку на денешните избори победи Фатах, малку е веројатно дека ќе дојде до коалиција со Хамас без посебни гаранции дека ова радикално движење нема да ги блокира мировните преговори со Израел.

Палестинскиот претседател Махмуд Абаз неодамна изјави дека доколку по изборите не биде во состојба да ги продолжи преговорите со Израел, ќе поднесе оставка.

Палестинците денеска ќе гласаат на 1.000 изборни места, а меѓународната заедница испрати 900 посматрачи.

/крај/б/ст/б