Свет
Струјата за „Силмак“ ни топи по 20 милиони евра
![](https://makfax.com.mk/wp-content/uploads/2016/11/84ecf311-70b5-4927-b9ad-012708efc02e-3406.jpeg)
Привилегираната цена на струјата што Владата му ја даде на „Силмак“ им јаде на граѓаните околу 22 милиони евра годишно.
ГРАЃАНИТЕ ОД СВОЈ ЏЕБ ЈА ПЛАЌААТ РАБОТАТА НА КОМБИНАТОТ ВО ЈЕГУНОВЦЕ
Привилегираната цена на струјата што Владата му ја даде на „Силмак“ им јаде на граѓаните околу 22 милиони евра годишно. Според енергетичарите, апсурдно е енергенсот за чиј увоз државата плаќа 55 евра по мегаватчас, на приватни компании да им го продава речиси тројно поевтино. Според груба пресметка, само годинава поранешниот „Југохром“ бара државата да му обезбеди околу 700 мегаватчаса електрична енергија. Ако се знае дека во наредните 12 месеци македонскиот електропреносен оператор МЕПСО ќе купува увозна струја за просечна цена од 55 евра по мегаватчас, тогаш лесно се пресметува бенефитот за „Силмак“. Разликата во цената, се разбира, ја плаќаат домашните потрошувачи. – Комбинатот ќе плаќа просечна цена од 22 евра за мегаватчас, а остатокот до 55 евра (од просечната цена на енергијата од увоз) што се множи со количествата што ги бара „Силмак“. Така се добива минус за државното салдо кој тежи 21 милиони евра – велат од „Електрани на Македонија“. Не се знае точно кој колку троши од увезената струја, но секогаш се земаат за репер количествата што државата ги набавува од увоз, бидејќи Македонија за огромни суми купува околу 30 отсто од годишните потреби. Токму тој процент (2,8 терават/часа) го побаруваат производителите од рангот на „Силмак“, „Фени“, „Макстил“ и уште седум капацитети од категоријата големи потрошувачи.
Од Владата неофицијално се правдаат дека капацитетот за феросилициум инвестирал во енергетска ефикасност и тоа било една од причините Јегуновце да добие евтина струја. Тоа не е доволно цврст аргумент за домашни енергетичари, бидејќи енергетска ефикасност подразбира подомаќинско трошење на струјата. Како што објаснува Владата, произлегува дека ем „Силмак“ разумно ја користи струјата, ем ја плаќа екстра поволно. – За сметка на бенефитот за приватниците, државата преку џебот на граѓаните ќе плаќа милионски суми. Од „Силмак“ лебот го вадат околу 1.020 вработени. Кога комбинатот не би работел, социјалната издршка (околу 4.000 денари) за целиот персонал државата годишно би ја чинела околу 850.000 евра – велат аналитичарите.
Според експертите, нелогичен е селективниот пристап едни да добиваат привилегии, а други да плаќаат поскапо. – Катастрофално е тоа што во година кога државата купува струја од увоз за просечна цена од 55 евра за мегаватчас, на „Силмак“ и на „Фени“ ќе им ја наплаќа двојно поевтино – изјави Влатко Чингоски, претседател на Здружението на енергетичари (ЗЕМАК), вработен во „Електрани на Македонија“. Разликата во цената е на товар на граѓаните и на претпријатијата, а средствата ќе се слеваат во приватни џебови, во случајов, кај газдите на привилегираните комбинати, тврди Чингоски. И за Пеце Недановски, продекан на Економскиот факултет во Скопје, одлуката нема економска оправданост бидејќи разликата во цената ќе ја плаќаат сите други потрошувачи.
Големите потрошувачи се класификувани во групата на оние што трошат или планираат да потрошат над 20 гигавати струја годишно. Од почетокот на годинава тие требаше за потребните количества струја, неопходни за процесот на производството, да склучуваат нови договори со државниот електропреносен оператор МЕПСО и да плаќаат според пазарни тарифи.
Антикорупциската комисија најави дека ќе ја преиспита владината одлука.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Свет
Шефот на кабинетот на Зеленски: Украина не е подготвена на компромис со Русија за да се стави крај на војната
![](https://makfax.com.mk/wp-content/uploads/2024/05/zelenski1.jpg)
Украина не е подготвена да постигне компромис со Русија и да отстапи од кој било дел од својата територија за да стави крај на војната, изјави началникот на кабинетот на украинскиот претседател Володимир Зеленски, Андриј Јермак.
Тој го изјави ова во вторникот во Вашингтон на новинарско прашање како ќе ја коментира изјавата на републиканскиот претседателски кандидат Доналд Трамп дека може бргу да го прекине конфликтот во Украина доколку биде избран за претседател на САД во ноември.
Јермак рече дека Украина ќе ги послуша сите совети за да постигне, како што наведе, праведен мир, но дека не може да прави компромиси кога станува збор за независноста, слободата, демократијата, територијалниот интегритет и суверенитет, пренесе „Ројтерс“.
Јермак е во посета на Вашингтон пред самитот на НАТО следната недела во главниот град на САД, каде што се очекува Украина да биде главна тема.
Досега САД испратија воена помош за Украина во износ од повеќе од 50 милијарди долари. Американскиот секретар за одбрана, Лојд Остин, во вторникот изјави дека САД набргу ќе објават повеќе од 2,3 милијарди долари нова воена помош за Украина.
Свет
Израел нареди евакуација на третина од Газа; ОН: Прашањето е каде да се оди
![](https://makfax.com.mk/wp-content/uploads/2024/02/gaza34.jpg)
ОН соопшти дека одлуката на Израел да ги евакуира Палестинците од областите Кан Јунис и Рафа е најголемата таква наредба во Појасот Газа откако борбите принудија 1,1 милион луѓе да го напуштат северниот дел на енклавата во октомври.
Портпаролот на ОН, Стефан Дужарик, во понеделникот рече дека наредбата за евакуација се однесува на една третина од Газа, а процената на Агенцијата на ОН за палестински бегалци (UNRWA) вели дека околу 250.000 луѓе моментно живеат во областа.
Тој смета дека „евакуацијата во толку голем обем само ќе ги влоши страдањата на цивилите и ќе ја зголеми потребата за хуманитарна помош“.
Тој предупреди дека луѓето се соочени со „невозможен избор повторно да се преселат, некои веројатно втор или третпат, во области кои едвај имаат доволно простор и функционални услуги, или да останат во област во која ќе има жестоки борби“.
Според Министерството за здравство на Газа, речиси 38.000 луѓе загинале во борбите. Во енклавата живеат околу 2,3 милиона луѓе.
„За ваша безбедност, мора веднаш да се евакуирате во хуманитарна зона“, објави на социјалните мрежи Авичај Адрае, портпарол на израелските одбранбени сили на арапски јазик.
Додека израелската воена операција против Хамас се одолжува во својот десетти месец, цивилите во Газа се притиснати во сè потесните делови на земјата поставувајќи шатори во урнатините на градовите, од кои веќе побегнале, или покрај морскиот брег.
Многу жители на Кан Јунис се преселија таму од Рафа, откако беше цел на Израел во мај, предизвикувајќи околу милион луѓе да избегаат за само неколку недели. Дотогаш Рафа беше последното прибежиште за цивилите во Појасот Газа.
Наредбата за евакуација дојде откога претходно во понеделникот беа лансирани најмалку 20 ракети од областа Кан Јунис кон израелските заедници, кои се граничат со Газа, според израелската војска.
Луиз Вотериџ, портпаролка на Агенцијата за помош и работа на ОН (UNRWA), која им помага на палестинските бегалци, рече дека наредбата за евакуација може да влијае на околу четвртина милион луѓе во Кан Јунис – од кои на многумина ќе им биде тешко да се евакуираат поради лошите временски и хуманитарни услови.
Дури и ако може да заминат, рече таа, не е јасно каде може безбедно да одат: „Дури и најздравите луѓе ќе се борат да се движат на овие температури со недостиг на храна и вода“. Таа додаде: „А каде да одат тогаш? Тоа е следното прашање“.
Свет
(Видео) „Сега речиси сите се бездомници“: Карибите под влијание на ураганот Берил, ветерот уништи сè што му се најде на патот
![](https://makfax.com.mk/wp-content/uploads/2024/07/shutterstock_1256683171-1024x683.jpg)
Речиси секоја зграда на островот Унион, кој е дел од карипската островска држава Сент Винсент и Гренадини, беше срамнета или сериозно оштетена по моќниот ураган Берил.
„Островот е во ужасна состојба откако помина Берил. Речиси сите се бездомници. Ретко која зграда е оставена да стои. Куќите беа срамнети со земја, патиштата блокирани, електричните столбови лежеа на улиците“, рече Катрина Кој, која беше изненадена од размерот на уништување што беше пред неа.
Со неа се сложува и рибарот и водич Себастијан Сејли, пренесува „Индекс.хр“.
„Сè е изгубено. Во моментот немам каде да живеам“, рече тој.
На островот живее од 1985 година, па го преживеал и ураганот Иван во 2004 година, но вели дека Берил бил на друго ниво.
Најмалку шест лица загинаа, а пет се водат за исчезнати кога ураганот Берил го погоди југоисточниот дел на Карибите, пренесува „Танјуг“.
Три лица загинаа во Гренада, едно во Сент Винсент и Гренадини, а двајца загинаа на северот на Венецуела, каде што пет лица се водат за исчезнати, соопштија официјални лица.
„Овде е како торнадо да поминало. 90 отсто од островот беше збришан. Се засолнив со сопругата и ќерката и, искрено да ви кажам, не бев сигурен дека воопшто ќе се извлечеме“, истакна тој.
Во неговиот глас сè уште се видливи шокот и стравот, пишува Би-би-си.
Неговата роднина Ализе, која води хотел со своето семејство, го опиша ужасното искуство додека ураганот минувал низ нивниот град. Таа нагласи дека морало да стават мебел до вратите и прозорците за да не се отвораат од силниот налет на ветерот.
„Притисокот беше толку силен што можеше да го почувствувате во вашите уши. Можевме да слушнеме како покривот се распаѓа и удира во друга зграда. Кршење прозорци, поплави. Никој не знаеше дека ќе биде толку лошо, сите се трауматизирани“, потврди таа.
Себастијан поседува две фарми и има кошници со пчели, но сè е целосно уништено. Сепак, тој тврди дека сега приоритет е да се најде засолниште за жителите на островот. Луѓето се обидуваа да соберат дрвени и пластични фолии за да направат некакво привремено сместување за нивните семејства.
„И очигледно е дека ќе биде тешко да се најдат вода и храна“, убеден е Себастијан.
Ализе истакна дека на островот итно се потребни многу видови стоки, од конзервирана храна и млеко во прав до санитарни производи, комплети за прва помош, шатори и генератори.
Владата во Сент Винсент и Гренадини рече дека ја препознава големината на проблемот.
Во своето утринско обраќање премиерот Ралф Гонзалвес го сумира чувството на шок во оваа карипска земја.
„Опасниот и разорен ураган остави големо уништување, болка и страдање кај нашата нација“, рече тој.
Тој вети дека ќе дејствува што е можно побргу за да се справи со долгата листа на приоритети.