Првиот претседател на Русија Борис Елцин денеска ненадејно почина во 77.година, соопшти Кремљ.

Првиот претседател на Русија Борис Елцин денеска ненадејно почина во 77.година, соопшти Кремљ.

Елцин беше на местото претседател од 1991 година до 31.декември 1999 година кога поднесе оставка и на местото вршител на должноста претседател го именуваше сегашниот шеф на држава Владимир Путин.

Борис Елцин е роден на 1.февруари 1931 година во селото Бутка, кај Јектерингбург, бивш Свердловск, на Урал. Завршил политехнички институт во Свердловск, каде ја започна и партиската кариера.

По преселување во Москва, дојде на чело на одделението за изградба на Централниот комитет КПСС, стана секретар на ЦК, а потоа во 1985 година и прв секретар на Московското градско партиско одделение.

За тоа време, брзо стана популарен не само меѓу Московјаните, туку и ширум Русија. Во 1987 година тој беше сменет од партиските функции, а се врати во високата политика дури во март, 1989 година, кога беше избран за народен депутат на СССР.

Во 1990 година, за прв пат беше избран за претседател на Врховниот совет на РСФСР. Истата година истапи од партијата, а во јуни 1991 година, на општите избори е избран за прв претседател на Руската федерација.

Во август 1991 година, во време на обид за државен преврат, Елцин застана на чело на демократските сили, а во септември го потпиша указот за забрана на Комунистичката партија.

Во тој период, во светот, неговото име се поврзуваше со преминот на државата во пазарен демократски систем.

Во декември 1991 година, Елцин, заедно со лидерите на Украина и на Белорусија, потпиша спогодба за создавање заедница на независни држави, што доведе до распад на Советскиот сојуз.

Во септември 1993 година го потпиша указот за распуштање на Сојузот на народни пратеници и Врховниот совет на Русија, и за одржување на изборот за нов орган на власта – федерално собрание, што доведе до нови судири во општеството, меѓу комунистите и демократите.

Со Елцин е поврзана и војната во Чеченија бидејќи по неговиот указ, во 1994 година беше упатена федералната војска во таа република.

Во јули 1996 година, Елцин повторно беше избран за руски претседател, добивајќи речиси 54 проценти од гласовите на бирачите.

Во ноември истата година, по неколку срцеви удари, му беше извршена операција на срце, но од јануари 1999 година, боледуваше од опасни здравствени кризи речиси секој месец.

Неочекувано, на 31.декември 1999 година, објави во телевизиско обраќање до нацијата, дека поднесува оставка на местото претседател и го именуваше тогашниот премиер Владимир Путин за вршител на должноста.

Автор е на книгите “Исповед на дадена тема”, “Записи на претседателот” и “Претседателски маратон”. Оженет беше, со две ќерки, шест внуци и две правнучиња.

/крај/бе/ис