Uncategorized
Жиците на мајсторството и емоциите
Концертот на канадската виолинистка Ралица Чолакова на Скопско лето
Концертот на канадската виолионистка Ралица Чолакова во вторникот (14 јули) во Музејот на град Скопје, во рамките на Скопско лето, можеби не е настан од калибарот на „француската буржоаска револуција“ (која се слави на истиот ден) во класичната музика, но сигурно спаѓа во оние настани чие скромно одбележување не е на одмет. Напротив. Често пати е неумешно да се плеткате во сферите за кои не сте експерт, но доволно е да се биде и „верзиран аматер“, или барем обичен, простодушен љубител, за да забележите дека виолинистичкиот рецитал на Ралица Чолакова, во пијано придружба на Зорница Радионова, е еден од оние „мали“ доживувања кои со случајната пријателска покана за овој настан непоправливо ја менуваат вашата убеденост дека „не се разбирате“ во класичната музика. И не е потребно кој знае колку да се разбирате: големите уметници како Чолакова се такви – големи – затоа што за еден час од рециталот знаат да изберат репертоар со вистински пресек на позначајните музички дела напишани за виолина… Така, делата на Виљем де Феш, Менделсон, Ерика Раум, Морис Равел, Коен Дежонг, Пјацола и др. во нејзината изведба прозвучуваа мајсторски точно, но и човечки „топло“: музичките критичари ќе го кажат останатото. Канадската виолинистка Чолакова, по потекло од Бугарија, се школувала на музичките академии во Софија и Виена (Австрија), а подолг период студиски престојувала и во престижниот Центар за уметности „Banff“. Има настапувано како солист со оркестри на камерна музика на голем број концерти и фестивали во Австрија, Аргентина, Белгија, Бугарија, Канада, Хрватска, Чешка, Данска, Франција, Еквадор, Германија, Русија, Словенија, Србија, Швајцарија, Унгарија, САД… Добитничка е на бројни стипендии и награди, а нејзината уметничка зрелост ја достигнува во Канада, каде што нејзините цедеа се наоѓаат во врвот на канадската аудио-продукција. Нејзините концерти постигнале рекордна слушаност на радиото CBC и на другите радио-станици во Канада, но и во Аргентина и во Бугарија. Но, Чолакова се занимава и со публицистичка дејност: нејзините трудови „Стапките на вечноста за животот на Моцарт“ и „Жени композитори во градот Квебек“, како и докторскиот труд „Канадски виолонистички концерти и нивните стилски карактеристики“ се уште еден дел од нејзиниот уметнички мозаик.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Uncategorized
Сончево и топло со мала до умерена облачност, попладне нестабилно време со пороен дожд и грмежи
Сончево и топло со мала до умерена облачност. Ќе дува слаб до умерен ветер од јужен правец. Попладне наместа, особено во северните делови ќе биде нестабилно со пороен дожд и грмежи, а ќе има и услови за краткотрајно невреме со силен ветер и изолирана појава на град. Минималната температура ќе биде во интервал од 7 до 14, а максималната ќе достигне од 24 до 29 степени.
Во Скопје сончево и топло со мала до умерена облачност. Попладне во делови од котлината ќе биде нестабилно со пороен дожд и грмежи, а ќе има и услови за краткотрајно невреме. Минималната температура ќе се спушти до 10, а максималната ќе достигне до 27 степени.
Во следните денови ќе се задржи топло време, но во попладневните часови наместа ќе биде нестабилно со пороен дожд и грмежи. Локално ќе има услови процесите да бидат поинтензивни во форма на краткотрајно невреме, со силен ветер, интензивен пороен дожд и изолирана појава на град.
Uncategorized
Претежно облачно и посвежо со повремени врнежи од дожд
Времето денеска ќе биде претежно облачно и посвежо со повремени врнежи од дожд. Попладне наместа врнежите ќе бидат пообилни (над 20 л/м2), локално поројни и проследени со грмежи. Ќе дува слаб до умерен, а долж Повардарието повремено засилен ветер од јужен правец. Минималната температура ќе биде во интервал од 7 до 15, а максималната ќе достигне од 13 до 19 степени.
Во Скопје претежно облачно со повремени врнежи од дожд, особено попладне кога во делови од котлината ќе бидат поројни. Ќе дува слаб до умерен ветер од јужен правец. Минималната температура ќе се спушти до 13, а максималната ќе достигне до 18 степени.
До четврток ќе преовладува променливо облачно и посвежо време со повремени врнежи од дожд и ретка појава на грмежи. Ќе дува слаб до умерен, а долж Повардарието повремено засилен ветер од југоисточен правец (над 60 км/час). Пораст на температурата се очекува кон крајот на седмицата.
Uncategorized
Премиерот Џафери и владиниот државен врв во чест на 9 Мај: Цврсто стоиме на браникот против фашизмот и во одбрана на европската идеја
Владиниот државен врв ги одбележува денешниот голем и значаен датум за Република Северна Македонија и за демократскиот свет, 9 Мај – Денот на победата над фашизмот и Денот на Европа.
Делегација на Владата на Република Северна Македонија, предводена од претседателот на Владата, Талат Џафери, во состав со министерот за локална самоуправа, Ристо Пенов, и заменик-министерката за правда, Викторија Аврамовска-Мадиќ, положи цвеќе и им оддаде почит на борците од Народноослободителната борба пред споменикот „Ослободители на Скопје“ на платото пред Владата на Република Северна Македонија.
На официјалната церемонија, реализирана со воени почести, почит оддадоа и положија цвеќе и: делегација на Сојузот на борците од НОАВМ, предводена од Наум Бурески, претседател на Градскиот одбор на Сојузот на борците, од Кабинетот на претседателот на Република Северна Македонија, Билјана Блажевска, аѓутант, делегација на Собранието на Република Северна Македонија, предводена од Снежана Калевска-Ванчева, пратеничка, делегација на Армијата на Република Северна Македонија, предводена од бригаден генерал Орце Јордев, како и претставници од дипломатскиот кор во државата, меѓу кои и амбасадорот на Европската Унија, Дејвид Гир, делегација на Град Скопје, претставници на политички партии.
Претходно, во церемонија со воени почести, делегации од Владата, од Кабинетот на претседателот на државата, од Собранието, од Сојузот на борците од НОАВМ, претставници од дипломатскиот кор, од Град Скопје, од политичките партии, оддадоа почит и положија цвеќе на Партизанските гробишта во Бутел.
Република Северна Македонија секогаш била на вистинската страна на историјата. Така било за време на Втората светска војна кога земјата била рамо до рамо со прогресивните антифашистички сили. Нашата држава е создадена на рушевините на фашизмот, во извојуваната слобода и со прогресивната идеја за напредок. И, денес, во сложениот геополитички контекст, стоиме со сојузниците како рамноправна членка на НАТО и идна членка на Европската Унија темелејќи го развојот на демократијата.
Пораката на премиерот Талат Џафери и на Владата во чест на денешниот 9 Мај, Ден на победата над фашизмот и Ден на Европа, е дека цврсто стоиме и ќе стоиме на браникот пред какви било форми на современ фашизам, кои се закана за мирот и прогресот насекаде во светот. Исто така, со искрена почит кон големата европска идеја, на која се темели изградбата на Европската Унија, ќе продолжиме да придонесуваме во заштитата и афирмацијата на европските вредности како гаранти на мирот и перспективите и на Република Северна Македонија. Република Северна Македонија припаѓа во европското семејство на народи и држави и стремежот на граѓаните за членство во Европската Унија заедно ќе го оствариме.