Втор бран на поплави ја зафати Чешка, овој пат јужниот и источниот дел на земјата, предизвикани од наглото топење на снегот на планините во северниот дел, јавуваат медиумите.

Втор бран на поплави ја зафати Чешка, овој пат јужниот и источниот дел на земјата, предизвикани од наглото топење на снегот на планините во северниот дел, јавуваат медиумите.

Критична е состојбата на реките Морава во јужниот и источниот дел на земјата, и Лаба во централна и северна Чешка, а вонредна состојба е прогласена во седум од вкупно 14 чешки региони.

Илјадници жители на градот Оломоук во Моравија, во југоисточниот дел на земјата имале исклучително тешка ноќ, бидејќи водата ја пробила браната. Хидрометеоролозите предупредуваат на критична состојба на осум насипи на реката Морава.

“Се плашам дека ова до сега во споредба со она што може да се случи во долниот тек на Морава личи на обична вежба“, изјави Стањислав Јуранек, претставник од Јужноморавскиот регион.

Поплавите на Волтава во Прага и на Лаба во која се влева Волтава не се разорни како во летото 2002 година, бидејќи системот брани јужно од Прага успева да го задржи бранот.

Од ноќеска полицијата ги чува специјалните брани против поплави што го штитат старото градско јадро, откако крадците една таква скапа бариера ја украле.

Лаба и притоките се закануваат повторно да го потопат некогашниот нацистички концентрационен логор Терезин, на околу 60 километри северно од Прага.

Вечерва чешката влада повторно ќе одржи вонредна седница, а премиерот Јиржи Пароубек најави дополнителни средства за загрозените подрачја. Владата досега за поплавените подрачја веќе издвоила 13,5 милиони евра.

Министерот за финансии Бохуслав Соботка процени дека штетата нема да биде толку голема како во 1997 и 2002 година, кога под вода остана третина од Чешка и дека сега нема потреба да се бара дополнителна помош од Европската унија.

/крај/б/ст