Црна хроника
Уништен насад со марихуана кај Горна Матка
Припадници на Министерството за внатрешни работи во присуство на надлежниот јавен обвинител во сабота претпладне уништија насад на марихуана во реонот на Горна Матка
Министерството за внатрешни работи информираше денеска дека од насадот информираат од МВР, биле искорнати околу 200 стебла марихуана чија бруто тежина изнесува меѓу 200 и 300 килограми.Сувата материја, која се употребува од наркозависниците тежи околу 40 килограми, а истата на домашниот наркопазар, достигнува цена од 1.200 евра по килограм. Растенијата се пренесени на дополнително вештачење од страна на експерти од Одделот за крим-техника.Насадот бил откриен по претходно добиени сознанија од пред околу еден месец, во атарот на скопското село Горна Матка, на 400 метри оддалеченост од манастирот „Света Богородица“. Садниците се наоѓале на непристапен и добро затскриен предел на површина од околу половина декар. За одгледување на марихуаната, како што информираат од МВР, биле направени и посебни канали по кои биле наводнувани стеблата, што јасно укажува дека не станува збор за див, туку за плански насад. Највисоките стебла, кои според првичните претпоставки биле засадени годинава на почетокот на месец април, достигнале висина од преку три метри, додека најниските биле високи околу еден метар. Според првичните анализи растенијата се уште не биле во фаза на цветање, но и во оваа фаза од развојот истите можат да бидат употребени од наркозависниците.Од самото откривање насадот бил под надзор на припадници на Единицата за недозволена трговија со наркотици, но во претходниот период на местото на кое се наоѓа не се појавијавиле лицето или лицата кои го засадиле. Покрај растенијата, од самото место денеска биле подигнати и кантички за носење вода кои дополнително ќе се вештачат заради обезбедување траги кои би довеле до утврдување на идентитетот на сторителите на кривичното дело „недозволено производство, трговија и пуштање во промет на наркотични средства, психотропни супстанции и прекурсори“.Во првите шест месеци од годинава, Единицата за борба против недозволената трговија со дрога и оружје при Одделот за организиран криминал од областа на недозволената трговија со дрога откри седум дела, при што одзеде 540 килограми и 684 грама марихуана, 81 килограм и 766 грама хероин и 260 семки од растението “канабис сатива“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Топ
Три лица, меѓу кои и полицаец, осомничени за разбојништво и противправно лишување од слобода
Јавен обвинител од Основното јавно обвинителство Скопје донесе Наредба за спроведување истражна постапка против две лица кои како соизвршители се осомничени за кривични дела – Разбојништво од член 237 став 1 и Противправно лишување од слобода согласно член 140 став 5 од Кривичниот законик.
Двајцата се осомничени дека на 23 април противправно лишиле од слобода едно лице, така што го повикале да излезе со изговор дека им е потребна помош, а потоа присилно го внеле во автомобил и се упатиле кон мостот на улицата “Беласица”.
Со возилото управувало трето лице – полициски службеник против кого постапката е издвоена и ќе ја води Одделението за гонење кривични дела сторени од лица со полициски овластувања и припадници на затворската полиција при Основното јавно обвинителство за гонење на организиран криминал и корупција.
Додека полицискиот службеник возел, двајцата други осомничени му се заканувале на оштетениот и му нанеле убодни рани со нож во ногата и во рамото. Кога стигнале под мостот, насилно го извадиле од автомобилот и сите тројца физички го нападнале со удари со клоци и тупаници по целото тело, нанесувајќи му тешки повреди.
Му одзеле околу 8.000 денари колку што имал оштетениот со себе во моментот, а потоа го пуштиле да си оди со закана дека доколку до 1 мај не им исплати 10.000 евра ќе го убијат и него и неговиот татко.
Основното јавно обвинителство Скопје до Основниот кривичен суд Скопје достави предлог за определување мерка притвор за двајцата осомничени против кои постапува. Едниот од нив е во бегство и притворската мерка ќе започне да се применува од неговото пронаоѓање и лишување од слобода.
Топ
Уапсени крадци на автомобили – ги расклопувале за делови
Единицата за внатрешни работи Центар и Бит Пазар при СВР Скопје поднесе кривична пријава против Ш.Н.(68) од Липково, поради постоење основи на сомнение за сторени 4 кривични дела „одземање на моторно возило“, од кои три на подрачјето на скопски Центар и едно на подрачјето на општина Аеродром, како и против Ф.Љ.(22) од Скопје, поради постоење основи на сомнение за сторено кривични дело „помагање“.
Имено, првопријавениот кривичните дела ги извршил во последните два месеца, така што со употреба на физичка сила и погоден алат ги отворал бравите од возилата, ги одземал возилата и ги предавал на второпријавениот, каде што возилата биле расклопувани и продавани за делови.
Полициски службеници со судска наредба извршиле претрес на локација, сопственост на Ф.Љ., каде биле пронајдени поголема количина делови од возила кои потекнуваат од кривичните дела. Известен бил Јавен обвинител, а од страна на Судија на претходна постапка на Ш.Н. му е одредена мерка притвор.
Топ
Две жртви во сообраќајката на патот Радовиш-Штип, уште едно лице повредено
Две лица загинаа на лице место во сообраќајната несреќа што се случи попладнево на магистралниот пат Радовиш-Штип.
Во несреќата е повредена и сопатничката од едното возило, која е пренесена во штипската Болница.
Веста за „Макфакс“ ја потврди портпаролката на СВР Струмица, Александра Трајанова, која информираше дека во несреќата учествувале автомобили „пасат“ и „опел“.
„На местото на несреќата починале возачите на двете возила, смртта ја констатирал лекар од „ЈЗУ Здравствен дом Радовиш“ а сопатничка од патничкото возило „опел” била пренесена во Медицински центар Штип“, информира Трајанова.
Увид на местото на несреќата врши јавен обвинител, а сообраќајот се пренасочува по стариот пат.
Од полицијата повеќе детали за несреќата најавуваат за утре.