Политички институции не треба да формираат новински агенции, оцени претседателот на европската секција на Меѓународната федерација на новинарите Марк Грубер, по повод идејата за основање новинска агенција на Европската унија (ЕУ).

Политички институции не треба да формираат новински агенции, оцени претседателот на европската секција на Меѓународната федерација на новинарите Марк Грубер, по повод идејата за основање новинска агенција на Европската унија (ЕУ).

Ова го објави весникот „ЕУ Обзервер“ (www.euobserver.com), повикувајќи се на одлуката на новинарите и новинарските организации да ја отфрлат идејата за формирање заедничка новинска агенција на ЕУ или Kодекс на однесување на медиумите.

Според потпретседателот на Европската комисија (ЕК) Маргот Валстром, на која и се препишува таквата идеја, овие предлози се извлечени од нејзината иницијатива за нова европска комуникација и се „лошо интерпретирани“.

Валстром, овој предлог, го претстави пред два дена, со цел, како што изјави, да се воспостави нова заедничка европска политика на планот на комуникациите за да се “зајакне јавната дебата во Европа“.

Таа предложи сегашниот аудиовизуелен сервис на ЕК, “Европа преку сателит“ (ЕБС) да биде подобрен и да работи со повеќе персонал, поголем буџет и поголема уредувачка независност.

Грубер, од друга страна, изјави дека му е „драго“ што таква сугестија не влегла во предлог.

“Потребно ни е повеќе професионализам во медиумските содржини што ги прави Комисијата, но не и “спинирање“ и би било тешко да не се прејде линијата и да не се манипулира“, оцени Грубер.

Предлогот доаѓа по серијата потези на Европската комисија (ЕК) чија цел е приближување кон граѓаните, како што е “план Д за демократија, дијалог и дебата“.

Овие активности се во врска со напорите на Комисијата да се преброди јазот меѓу институциите на ЕУ и граѓаните на 25-члениот блок, што влијаеше врз отфрлување на европскиот устав во Холандија и Франција, во изминатата пролет, пишува “ЕУ Обзервер“.

/Крај/бе/ис/б