Домашен
Вардарки подготвени за пресметката со европскиот првак
Ракометарките на Вардар во наредните десет дена ќе ги одиграат двата најважни натпревара оваа сезона. Избраничките на Индира Кастратовиќ во четвртфиналето во Лигата на шампионките ќе се сретнат со европскиот првак Ѓер, првиот натпревар ќе се одигра в сабота во Скопје, а возвратниот меч во Унгарија е закажан за 11-ти април.
„Овие два натпревара ги дочекуваме подготвени, работевме квалитетно во овој период и она што е најважно – немаме повредени ракометарки. Добро ни е познато каков тим е Ѓер, но тие доаѓаат кај нас во Скопје и ние воопшто не треба да размислуваме каков ќе биде резултатот. Се надевам дека ќе успееме да го испочитуваме она што ќе го договориме пред натпреварот. Важно е како ќе одиграме во одбраната и како ќе ги одиграме почетните минути“, рече тренерот на Вардар, Индира Кастратовиќ.
Ѓер оваа сезона има само два пораза во Лигата на шампионките, и двата од Ларвик во осминафиналната група. Токму играта на Ларвик може да биде добар патоказ како да се порази и елиминира европскиот шампион.
Инаку Ѓер и оваа сезона ќе биде домаќин на завршниот турнир во Лигата на шампионките, но во Вардар не стравуваат дека тоа може да предизвика дополнителен притисок.
„Јас како тренер не сакам да размислувам дека Ѓер може да добие некаков ‘ветер во грб’. Ние треба тука да избориме добар резултат, ние како стручен штаб и ракометарките не трба да се оптоваруваме со тоа. Треба да се фокусираме на Ѓер како тим, а имаме и ние наши луѓе кои доколку има нешто треба да реагираат“, рече Кастратовиќ.
Дел од тимот на Вардар веќе втора сезона се Андреа Лекиќ и Јованка Радичевиќ кои во Скопје пристигнаа токму од Ѓер и со овој тим стигнаа до титулата европски првак.
„Јас и Јованка (Радичевиќ) бевме дел од таа унгарска машина, тоа е тим кој веќе трета сезона го предводи Амброш Мартин, двапати ја освојувале европската титула и сигурно е дека тие се фаворитки, но ние не се оптоваруваме со тоа. Очекувам една пеколна атмосфера и се надевам на позитивен резултат во најзначајниот натпревар за нас оваа сезона. Очекувам поддршка каква што имаат мажите, во таква атмосфера невозможно е да не се одигра добро“, рече средниот бек Андреа Лекиќ.
„Дојдовме во ситуација кога овие две средби треба да ја решат целта наша сезона. Јас верувам дека имаме квалитет и мотив да играме против европскиот првак. Можеби оваа сезона не игравме во континуитет најдобро, но можеби тоа е добро, никогаш не се знае кога ќе блеснеме. Противникот добро го анализиравме и точно знаеме што нé очекува. Не треба со ‘жешки’ глави да влеземе во овој натпревар, бидејќи ова е само прво полувреме од овој двомеч, доколку влеземе со преголема желба, тогаш натпреварот може да отиде во контраправец. Треба да влеземе во мечот со ‘студени глави и жешко срце’ и со добра игра да покажеме колку можеме“, рече Јованка Радичевиќ.
Првиот четвртфинален меч меѓу Вардар и Ѓер ќе се одигра в сабота, во Спортскиот центар „Јане Сандански“, со почеток во 19 часот./крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.