Проширувањето на Европската унија треба да продолжи со начелото дека земјите кандидати треба да ги исполнат бараните услови, но притоа не смее да се доведе во прашање способноста на Унијата да функционира ефикасно и да се разви

Проширувањето на Европската унија треба да продолжи со начелото дека земјите кандидати треба да ги исполнат бараните услови, но притоа не смее да се доведе во прашање способноста на Унијата да функционира ефикасно и да се развива.

Ова е главниот заклучок со кој заврши дводневниот самит на ЕУ во Брисел, кој беше посветен главно на проширувањето на Унијата.

„Важно е, земјите кандидати да ги исполнат бараните услови, при што Унијата треба да се обезбеди дека може ефикасно да делува и да се развива", рече по завршувањето на состанокот на шефовите на држави или влади на земјите членки на ЕУ, премиерот на Финска Мати Ванханен, чија земја месецов го завршува претседавањето со ЕУ.

„Не поставивме нови критериуми, вратата останува отворена", додаде Ванханен, истакнувајќи дека Европскиот совет „ја потврди европската перспектива на западниот Балкан".

Во рамките на заклучоците за проширувањето, Европскиот совет утврди посебни

параграфи за двете земји кои се во преговарачкиот процес; Хрватска и Турција, и за земјите од западниот Балкан, меѓу кои е и Македонија.

Македонија е повикана да ги забрза реформите во клучните области, како и имплементацијата на приоритетите од Европското партнерство, за да направи напредок кон целта во процесот на придружување.

Шефовите на држави и влади на ЕУ повторија дека признавањето на статусот кандидат за членство во ЕУ на земјата, е признание за успехот на Македонија во реформите.

Во однос на Хрватска, лидерите на ЕУ ги поддржаа заклучоците на министрите за надворешни работи на ЕУ од пoследниот состанок на 11 декември, во кои се наведува земјата направила напредок во последните години.

Финскиот премиер и претседател со Европскиот совет додаде, дека со одлуката за делумно замрзнување на преговорите со Турција, преговарачкиот процес со таа земја не е запрен.

Претседателот на Европската комисија Жосе Мануел Баросо рече дека е постигнат „консензус за проширувањето“, кој се базира на таканаречените три „С“ (consolidation, conditionality, communication – консолидација, условeност и комуникација).

/крај/хн/ил/б