Регион
Протести во Нови Сад и барање Војводина да биде република

Членови и симпатизери на Војводинската партија (ВП) и на Војводинскиот клуб, одржаа во неделата во Нови Сад, главниот град на северната српска автономна покраина Војводина, манифестација наречена „Прошетка за Војводина“, по повод 26 година од ткн „јогурт револуцијата“ со која приврзаниците на поранешниот српски челник Слободан Милошевиќ ја урнаа тогашната војводинска власт, и побараа Војводина да стане република во федерализираната Србија, пренесуваат тамошните медиуми.
По шетањето по центарот на Нови Сад, околу двесте приврзаници на војводинските организации се собраа пред зградата на војводинската влада и до државните тела на Србија упатија три барања – за промена на уставот, федерализација на Србија и доделување на Војводина статус на република во федерализираната Србија, пренесе Радио-телевизија Војводина (РТВ).Претседателката на Војводинскиот клуб, Бранислава Костиќ, потсети дека на 5-ти октомври се навршуваат 26 години откако на Војводина ѝ се одземени со уставот гарантираните права на автономија и од кога, како што рече, Војводина оди во провалија. „Војводина не може да биде развиена без целосна и вистинска автономија. Сакаме не само законодавна, судска и извршна власт во Војводина, туку и таа да добие статус на република“, изјави Костиќ.Претседателот на Војводинската партија, којашто не е парламентарна, Александар Оџиќ, истакна дека неговата партија никогаш нема да го прифати уставот на Србија од 2006 година, којшто, според него, ја разорил Војводина. Покрај приврзаниците на идејата за статусот на република за Војводина, прошетка низ Нови Сад за неделата планираа и припадниците на десничарската српска организација која во медиумите е означена како екстремна „Српски собор Заветници“ и на движењето „Двери“, но министерството за внатрешни работи од безбедносни причини ги забрани нивните собири. Поради тоа, од рано наутро во неделата силни полициски единици беа распоредени на локации во строгиот центар на Нови Сад, но инциденти не се пријавени.Претставниците на раководството на „Српски собор Заветници“, и покрај забраната за одржување на јавната конференција на Плоштадот Слобода во Нови Сад, го осудија одржувањето на прошетката на „автономашите“. „Нашата намера беше да укажеме на проблемот на растење на сепаратизмот, но полициската управа на Нови Сад би го скрати правото да им се обратиме на медиумите на Плоштад Слобода и да ја пренесеме порака на мнозинството слободномислечки граѓани на Србија“, изјави портпаролката на „заветниците“, Милица Ѓурѓевиќ. Војводинскиот клуб е невладина организација, додека Војводинската партија е политичка и двете најистрајно се залагаат за промена на српскиот устав за Војводина да го добие составот на република во федерализирана Србија. Тие неодамна започнаа да собираат потписи за таа иницијатива којашто досега ја поддржаа околу 30 илјади жители на Војводина./крај/мф/сн
Извор: РТВ
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Регион
Поевтини цени на околу 25 видови производи ќе има во Србија во следните шест месеци

Во Србија од утре и во следните шест месеци, цените на околу 25 видови производи треба да бидат пониски, бидејќи Владата, со усвојување на Уредбата за посебни услови за вршење трговија за одредени видови стоки, ги ограничи маржите на до 20 проценти. Новите правила ќе важат за сите трговски субјекти кои во 2024 година оствариле приходи од над 4,5 милијарди динари или околу 38 милиони евра, што значи дека сите трговски синџири ќе мора да ги применуваат, а некои од нив лани имале повеќе од една милијарда евра профит.
Министерот за финансии на србија, Синиша Мали, изјави дека од утре, цените на 20.000 производи од 23 категории ќе бидат намалени на полиците на сите малопродажни синџири, како што е предвидено со уредбата на Владата за ограничување на маржите.
„Очекуваме намалување на цената од 10-15-20 проценти во просек, во зависност од тоа колку била маржата на одреден производ претходно. Важно е да не станува збор само за неколку производи, туку за целиот асортиман на храна што сите ја купуваме секој ден“, рече Мали во интервју.
Тој изјави дека анализата утврдила дека цените на прехранбените производи, безалкохолните пијалоци и сличните производи во голема мера го диктираат нивото на инфлација и дека тоа мора да се ограничи.
Српскиот претседател Александар Вучиќ и министерката за трговија на Србија, Јагода Лазаревиќ, објавија дека морала да се дополнува Уредбата бидејќи одредени трговски синџири се обиделе да најдат начин да ги заобиколат новите правила.
„Прерано почнаа со трикови. Мислат дека се доволно мудри за да ја измамат државата“, рече Вучиќ, коментирајќи ги реакциите на малопродажните синџири на ограничените маржи.
Како што објасни Вучиќ, трговците барале од добавувачите да ги зголемат цените за 14 до 20 проценти пред да стапи во сила Уредбата, а разликата подоцна да ја вратат преку попусти. На тој начин, трговците би ја пресметале маржата на новата, вештачки зголемена цена и би ги избегнале потенцијалните загуби што можат да настанат поради Уредбата. Во исто време, на тој начин формално би ги исполниле барањата, но со иста заработка како и претходно.
Попустот, патем, е попуст што добавувачите или производителите му го даваат на трговецот, најчесто при купување одредена количина стока.
Вучиќ додаде дека трговците на мало им кажуваат на добавувачите дека ќе ја повлечат својата стока од полиците ако не го исполнат овој услов. Иако не прецизираше за кои пазари станува збор, тој ги замоли луѓето од „трите најголеми малопродажни синџири“ доколку се одговорни, „да не се обидуваат да ја поразат државата“ и „да не мислат дека се многу паметни, а ние сме многу глупави“.
Вучиќ додаде дека на трговците им е дозволено да имаат маржа од 20 проценти, но сепак, според него, трговците сега сакаат да ги пресметуваат логистичките трошоци по стапка од 10 проценти. Тие логистички трошоци, патем, ги претставуваат сите трошоци направени при набавка на стоки, како што се транспорт или складирање во магацин.
Министерката Лазаревиќ рече дека сите во Министерството „биле шокирани“ што на денот на усвојувањето на Уредбата за посебни услови за вршење трговија за одреден вид стока, некои трговски синџири „започнале со сериозен притисок врз своите добавувачи“, инсистирајќи на склучување анекс на договорот, за да направат одредени корекции, и тоа пред да стапи во сила Уредбата.
Токму поради тие притисоци, е изменета и Уредбата.
Како што објави Министерството за трговија по вонредната седница на Владата на Србија, промените го ограничија попустот за логистика и другите надоместоци. Така, Уредбата за посебни услови за вршење трговија за одреден вид стока сега содржи одредби со кои се ограничува „логистичкиот рабат“ и „надоместокот за недостиг на стока и отпис на стока“ на три и еден процент, соодветно.
Уредбата за посебни услови за вршење трговија за одреден вид стока предвидува дека ограничувањето на маржите до максимум 20 проценти се однесува на околу 25 видови производи кои треба да имаат пониски цени во продавниците почнувајќи од утре.
Регион
(Видео) Силна бура го парализираше црногорското приморје, најкритично во Котор

Силна бура го погоди црногорскиот приморски појас утрово, оставајќи го Котор и околните градови под тежок пороен дожд. Которскиот Залив е целосно погоден од силниот дожд и ветрови, а морето е разбрането, со големи бранови кои се спојуваат со сивото небо.
Туристите, кои вчера уживале во пливање, денес се соочуваат со потполно нестабилни услови.
„Колку и да уживавме во пливањето вчера, денес можеме да пливаме на улица“, изјавил еден од нив.
Ситуацијата е особено критична во близина на Вирпазар, каде што сообраќајот е прекинат поради несреќа, објави РТЦГ. Локалните власти апелираат на внимание и ги советуваат граѓаните да ги следат предупредувањата за безбедност.
Регион
(Видео) Драма на скопскиот аеродром: Aвион од Крит со 200 лица слета во Скопје наместо во Белград

Патници на авиокомпанијата „Виз ер“ кои требаше да летаат од Крит за Белград, наместо тоа завршија на аеродромот во Скопје околу 4 часот утрото, пренесува N1.rs.
Летот, кој бил закажан 15 минути по полноќ, првично бил пријавен како празен, што ги изненадило и полицијата и вработените на скопскиот аеродром.
Јелена, една од патничките, изјавила дека околу 200 лица излегле од авионот, без претходна информација за пренасочувањето. Патниците најпрво добивале СМС-пораки за одложување, а потоа, во 4:20 часот, полетале кон Скопје. На аеродромот биле задржани во авионот подолго време, а не им било дозволено да излезат сè додека една жена не почувствувала влошување на здравјето. На крајот, патниците останале на празен аеродром додека не им бил обезбеден автобус за Белград.
Пилотот им појаснил дека неговото работно време е завршено и дека повеќе информации ќе добијат на аеродромот, но и таму вработените биле целосно збунети бидејќи им било пријавено дека авионот е празен. Патниците се обратиле и до Амбасадата на Србија, но добиле одговор дека не може ништо да се стори, со образложение дека „аеродромот во Белград не работи и не прима авиони“.
Според официјалните информации, веб-страницата на белградскиот аеродром го прикажува летот како откажан, додека на македонскиот аеродром е евидентиран како реализиран, но со задоцнување од повеќе од три часа. На веб-сервисот FlightRadar се забележува дека авионот наместо во Белград, слетал во Скопје, без објаснување за причините.