Домашен
Металург со Мојсоски против Татран Прешов
Ракометарите на Металург во сабота ќе го одиграат првиот официјален натпревар во новата натпреварувачка сезона. Прв противник на екипата од Автокоманда ќе биде Татран Прешов, учесник на минатосезонскиот завршен турнир во СЕХА лигата.
Металург, како што најави тренерот Лино Червар, со овој натпревар ќе ја започне новата тимска стратегија, според која поголема шанса ќе добијат младите играчи. Она што го радува стручниот штаб е што на овој меч во тимот ќе се врати капитенот Наумче Мојсоски кој целосно се опорави од тешката повреда, со која се здоби во декември минатата година. „Татран е многу сериозна екипа, која во СЕХА лигата нам секогаш ни прави ’проблеми’. Јас се надевам дека ќе избориме позитивен резултат. Сепак, како и минатата сезона СЕХА лигата нема да ни биде приоритет, ќе ја користиме за воигување. Прва цел ни е да ја минеме групата во ЛШ, а потоа и борбата за титулата. За домашното првенство не би сакал да коментирам, бидејќи има уште многу време до април. Ќе има квалитетна борба, приматот ќе го има Вардар кој донесе квалитетни засилувања, тие ќе го ’водат орото’, но ние нема да се предадеме пред време“, рече Мојсоски. Дека Мојсоски е подготвен потврди и стратегот на Металург, кој рече дека планирано е тој да настапи против словачкиот шампион. „Драго ми е што Мојсо се врати, ме изненади како работеше на почетокот на подготовките во Маврово. Не е ист тимот со него и без него во тимот, тој ги одбележа сите наши добри резултати во изминатите години. Татран е екипа која за седум дена во Брест ќе игра квалификации за пласман во ЛШ, значи тие се во топ форма. Ние отвораме во СЕХА лигата, а кон крајот на септември ќе играме против ПСЖ во ЛШ, значи имаме уште доста време да ја достигнеме вистинската форма. Но, сепак, сметам дека ова ќе биде добар натпревар. Го гледав Татран на турнирот во Добој каде го освоија првото место, во нагорна линија им е формата, се засилија во преодниот рок. Но тоа е добро и СЕХА лигата да биде силна“, рече Червар. Натпреварот меѓу Металург и Татран Прешов ќе се одигра во арената „Борис Трајковски“, в сабота со почеток во 20:15 часот./крај/мф/нц
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Домашен
Денеска во Прилеп 11. планинска трка „Крали Марко Треилс“
Во Прилеп денеска ќе се одржи 11. трка во планинско трчање „Крали Марко Треилс“. Од 250-те пријавени учесници, 78 отсто се од земјава, а останатите 50-тина се од други 12 држави, најмногу од регионот: Србија, Косово, Грција, Албанија,… На трката ќе учествуваат повеќето од најбрзите македонски планински тркачи, репрезентацијата во планинско трчање на Србија, како и поранешната шампионка на Шведска во 100 километарски ултра маратон Лиса Ринг.
„Крали Марко Треилс“ предвидува две трки со различни должини. Пократката, долга 18 километри, е најстарата и најпопуларна планинска трка во државава, наречена „Трескавец Треил“. Почнува од Варош во Прилеп и преку Марковите Кули и пејсажните ритчиња ги води 160-те натпреварувачи кон манастирот Трескавец, а потоа назад во Прилеп.
Подолгата трка, „Камена Баба Треил“, долга 35 километри, исто така почнува од Варош и ја следи патеката до манастирот Трескавец, но оттаму продолжува низ карпести предели преку Камена Баба. За неа се пријавени 80-тина планински тркачи.
Настанот е во организација на здружението ТРЕКС од Скопје и е наменет за рекреативни, аматерски и професионални спортисти со различно ниво на физичка подготвеност.
Домашен
(Видео) Бугарски навивачи се судрија со полицијата на стадион: фрлаа со предмети, па следуваше апсење
Бугарски навивачи се судрија со македонската полиција на арената „Тодор Проевски“ каде се игра натпреварот Шкупи (Македонија) и Левски Софија (Бугарија).
Турканицата продолжи со вадење на ремени од страна на навивачите и фрлање предмети како што се лименки пива, сокови и слично. По ова, имаше и неколкумина уапсени. Полицијата ги извади од стадионот и однесе со комбиња во станица.
„Макфакс“ контактираше со МВР од каде проверуваат зошто дошло до судирот, како и, како е постапено со уапсените лица.
Ова е втор инцидент. Претходно, во Чаир, беа каменувани два автомобили со бугарски натпреварувачи. На ова претходеа низа провокации на социјалните мрежи и телевизиски изјави со навредувачки пароли за Македонија. Навредувачки навивачки песни, се пееа и на трибините.
Домашен
(Видео) Оформен предмет за полицаецот кој со пендрек го нападна Талески: Имало турканица, службеник преземал и физички мерки
МВР отвори предмет против полицаецот кој со пендрек го удри ракометарот Филип Талески, за да се утврди зошто се решил на таков потег и дали ќе следи казна. Чинот наиде на лавина коментари во јавноста и осуда. Досега, во МВР не е поднесена пријава за ударот на Талески.
„По завршување на спортскиот натпревар, поради меѓусебна турканица на неколку ракометари од двете екипи на терен, најнапред реагираше обезбедувањето на натпреварот, а потоа од страна на еден полициски службеник од полициската станица од општа надлежност Охрид преземени се физички мерки. По службена должност Одделот за внатрешна контрола, криминалистички истраги и професионални стандарди при МВР оформи предмет и презема мерки за целосно расчистување на случајот, велат од МВР за „Макфакс“.
Тие додаваат дека пријава досега не добиле.
„По вчера одиграниот ракометен натпревар КУП на Македонија-финале помеѓу ракометните екипи „Еурофарм Пелистер“ од Битола и „Вардар“ од Скопје, во СВР Охрид не е поднесена преставка, поплака или друг вид на пријава од ракометари, делегати или други официјални спортски претставници против полициски службеници кои извршуваа обезбедување на натпреварот што го следеа околу 4000 лица“, додава МВР.