Претседателот на Владата, Христијан Мицкоски на денешната собраниска седница за пратенички прашања истакна граѓаните треба да ја знаат вистината дека владата на ДУИ и СДСМ каде прв вицепремиерот беше Артан Груби препорача да се укине балансерот и за тоа ДУИ им должи извинување пред сè на граѓаните Албанци, а Законот за правична застапеност кој го изготви оваа влада доби позитивна препорака од Венецијанска комисија, а одлуките на комисијата се спроведуваат согласно методологијата за пристапување кон ЕУ.

„Не е точно и не е вистина дека со доаѓањето на оваа Влада е избришан инструментот балансер, вистината е дека Владата во која беше ДУИ, а потпретседател или прв потпретседател Артан Груби, на седница донесе одлука во којашто го брише и дава мислење дека треба да се избрише инструментот балансер. Истото тоа понатаму е содржано во скрининг извештајот на Европската Унија, тоа е вистината и треба сите граѓани во целата државата без разлика на етничката припадност да ја знаат вистината, бидејќи заслужуваат да ја знаат вистината“, потенцираше премиерот Мицкоски одговарајќи на пратеничко прашање од пратеничката Рина Ајдари од ДУИ.

Премиерот Мицкоски нагласи дека за Законот за правична застапеност, Венецијанска комисија даде позитивна препорака за овој закон, а одлуките на Венецијанска комисија според новата методологија на пристапување и преговарање по кластери, а побарана од страна на Франција се одлуки кои не се коментираат туку се спроведуваат, затоа што се дел од пристапниот процес кон Европската Унија.

„Од една страна зборуваме за ЕУ, за членство во ЕУ, за полноправно членство, а од друга страна велите дека законот бил ваков или таков. Да ви помогнам, Венецијанска комисија има дадено позитивна препорака за усвојување на овој закон. Дали тој вас ви се допаѓа или не, јас нема да навлегувам во таа дискусија со која ќе овозможам да вие добивате вештачко дишење како политичка опција за да опстоите на политичката сцена бидејќи доживеавте дебакл не така одамна со овие пораки, и тогаш сè тоа ви изгледаше смешно и саркастично, но гласачите си го кажаа своето на изборите и откако го кажаа тоа наместо да извлечете поука, вие континуирано продолжувате така да се однесувате, мислејќи дека на тој начин ќе привлечете внимание и од гласачите и од јавноста. Нема да навлегувам во етнички поделби бидејќи не е тоа дел од мојот карактер, сум го кажал тоа многу пати и ќе повторам, како претседател на влада јас сум на сите граѓани без разлика на политичка, етничка или верска поделба и така ќе продолжам да се однесувам бидејќи тоа ми е важно“, изјави премиерот Мицкоски.

Премиерот Мицкоски посочи дека изнесувањето невистини од страна на пратениците на ДУИ од собраниската говорница нема да им донесе политички поени, туку ќе им одземе, но чесно и доблесно ќе беше да излезат и да кажат и се извинат за тоа дека владата во која ДУИ беше партнер со СДСМ е таа која препорача да се избрише балансерот, додека за време на истата влада се избрани судиите од Уставен кои донесоа одлука да се укине балансерот.

„Денес откриваме нови факти за бизнисите на Зоран Заев и Венко Филипче во Дубаи. По сведоштвото од страна на Томе Аврамски, поранешен соработник на Зоран Заев, дека во Дубаи Заев гради 42катница, а дополнително со Филипче имаат станови во друг објект, од СДС молк на темата и крици на беспомошност“, кажа Валентин Манасиевски, член на ЦК на ВМРО-ДПМНЕ.

„ВМРО-ДПМНЕ долго време веќе говореше во јавноста дека Заев и Филипче имаат златни визи за Дубаи, а за истите и самите потврдија, но не кажаа на кој начин ги добиле. По се изгледа, стекнувањето на златна виза е поради влог во недвижности.

Иако Филипче призна дека златната виза е последица на работен ангажман во некаква си болница во Дубаи и вети дека тоа ќе го докаже, јавноста не виде никакви документи.

Јавно го прашуваме Венко Филипче, каква е неговата улога во изградбата на 40катницата на Заев, за која сите слушнавме сведоштво? Дали златната виза на Венко во Дубаи е резултат на тоа што Венко Филипче е бизнис партнер на Зоран Заев во градење на згради? Од каде му пари на Венко за да си дозволи толку голем влог, со оглед на тоа дека тој самиот кажува дека има досега работено како доктор и како пратеник? Дополнително, Филипче треба да одговори на чии име се води станот за кој Томе Аврамски вели дека е во негова сопственост?

Почитувани граѓани, додека Венко и Заев продаваат грижа, морал и достоинство во државата, од друга страна гледаме како се расфрлаат со милиони за изградба на 40катница, и тоа не било каде, туку во Дубаи. Го повикуваме ЈО да го истражи случајот“, изјави Валентин Манасиевски, член на ЦК на ВМРО-ДПМНЕ.

Судот ги слушна воведните зборови на сите 35 физички и три правни лица обвинети за пожарот во кочанската дискотека „Пулс“, во која загинаа 63 лица, а над 200 беа повредени. Александар Нацев, обвинет дека е реален сопственик на агенцијата за обезбедување „Рубикон“ и не подготвил и не поднел план за обезбедување на локалот вечерта кога се случи пожарот, исто како и сите негови претходници, рече дека нема вина и дека во текот на постапката ќе го докаже тоа.

„Девет месеци молчев и бев жртва на медиумски и јавен линч спроведен преку разни квазиексперти и безбедносни аналфабети. Со неверување гледав како со неверојатна леснотија одново и одново беше рушена пресумцијата на мојата невиност додека целиот тој период бев таргет и на разни неосновани политизирани клевети и навреди. Денес, сите овде сме исправени пред брутално силување на Законот за приватното обезбедување со цел одредени негови одредби да послужат како поткрепа на теоријата на случај во обвинението“, рече Нацев.

Со барањето одговорност од агенцијата за обезбедување „Рубикон“ тој смета дека малициозно се префрла вината што ја имаат државните органи задолжени за превенција, надзор и контрола.

„Во текот на ова судење ќе ги неутрализираме ваквите конструкции преку непобитни докази и околности, кои јавно ќе укажат на отсуство на каква било вина кај мене или каква било таканаречена каузална поврзаност со трагичниот настан за време на чие случување јас воопшто не бев ни присутен во државата“, рече Нацев.

Неговиот бранител рече дека во постапката ќе докажат дека „Рубикон“ вечерта немал обврска да направи и да пријави план за обезбедување оти имале само тројца обезбедувачи, а законот пропишува таква обврска за настани на кои се ангажираат петмина или повеќе, па рече дека ќе докаже оти Нацев не е реален сопственик на агенцијата, туку дека кусо време бил вработен како консултант поради неговата стручност.

И бранителите на правните лица „Рубикон“ и „ММММ кафе“ ДООЕЛ во денешните завршни зборови го оспоруваат обвинението, рекоа дека не е јасно со кои конкретни дејства одгворните лица ги презеле за да бодат обвинети правните лица и најавија дека во текот на постапката ќе докажат оти нема вина кај обвинетите правни лица.