Надворешната канцеларија за криминалистички работи Гостивар поднесе кривична пријава против лицата И. Д. (51) и Н. Д. (49), двајцата од с. Чегране, Гостиварско, поради постоење основи на сомнение за сторено кривично дело насилство.

Според информациите од МВР, на 24.11.2019, на улицата 18 Ноември во Гостивар, оштетениот Р. Д. (47) од с. Чегране, Гостиварско, со сопругата и синот пристигнале пред Полициската станица Гостивар за да пријават физички напад извршен врз неговиот син, каде што се сретнале со пријавените лица, кои физички го нападнале Р. Д. Првопријавениот при нападот употребил тврд предмет. Од полициски службеници пријавените биле лишени од слобода.

Полициски службеници при СВР Куманово синоќа на улицата Трета македонска бригада во Куманово забележале човек што предизвикал пожар на полициско возило „шевролет спарк“, кое било паркирано пред поранешниот Дом на АРМ.

Како што наведува МВР, лицето се дало во бегство, а по кусо време од страна на полициски службеници било забележано на улицата Боро Прцан, но не ја почитувало дадената наредба за застанување, туку вперило огнено оружје и испукало неколку проектили кон нив по што побегнало. Во инцидентот нема повредени.

Опожареното возило е изгаснато по интервенција од страна на Противпожарната единица Куманово. Во координација со јавен обвинител извршен е увид на местото на настанот од страна на екипа од СВР Куманово. Се преземаат мерки за расчистување на случајот.

Надлежен јавен обвинител од Основното јавно обвинителство Скопје поднесе обвинителен акт против 27-годишен скопјанец што криел марихуана во дворот на сосетката.

Обвинетиот 27-годишник неовластено, заради продажба, држел наркотична дрога марихуана, со вкупна нето-маса од 1.521,2 грам. Дрогата била спакувана во три полиетиленски пакувања завиткани со транспарентна фолија, а обвинетиот ги чувал скриени во дворот на своја сосетка во Ѓорче Петров. Извршувајќи работи во дворот, сосетката ги пронашла дрогата и една дигитална вага со остатоци од марихуана.

Јавниот обвинител предложи на обвинетиот да му биде продолжена претходно определената мерка притвор, со оглед на тоа што се работи за лице претходно веќе осудувано за исто дело, што го оправдува стравот дека тој би можел да го повтори делото или да се даде во бегство доколку биде пуштен да се брани од слобода.