Основното јавно обвинителство Кочани до надлежниот суд доставил предлози за продолжување на мерката краткотраен притвор за нови 48 часа за 16 лица досега опфатени со постапката на кои оваа мерка им истекува во текот на денот.

На уште две лица, по предлог на обвинителството, притвор им е определен во текот на вчерашниот ден и тој се уште трае.

До овој момент мерката краткотраен притвор е побарана за 18 лица, соопшти обвинителството.

Министерот за здравство Арбен Таравари утрово со олеснување извести дека поминале критичните 72 часа за повредените во пожарот во Кочани. Дома и во странство се лекуваат вкупно 178 пациенти и сите се во стабилна состојба.

Ги поминавме првите критични 72 часа, нема ниеден починат од оние што ја преживеаја трагедија. Се надевам дека сите пациенти ќе закрепнат и полека-полека од идните прес-конеренции да зборуваме само колку пациенти си одат дома.

„Добрата вест што сакаме да ја соопштиме е дека ги поминавме првите критични 72 часа, нема ниеден починат од оние што ја преживеаја трагедија. Се надевам дека сите пациенти ќе закрепнат и полека-полека од идните прес-конференции ќе зборуваме само колку пациенти си одат дома. Се третираат вкупно 178 пациенти во повеќе здравствени установи. Од нив, 64 се во државните болници во Македонија и 13 пациенти се во приватните. Сите се во релативно стабилна состојба. Во моментот 101 пациент се третираат надвор од државата. Сите се во релативно стабилна состојба“, рече министерот Таравари.

Вчера, лично ги посетил сите пациенти сместени во Солун и во Софија. Во Солун се петмина, во Софија деветмина. Двајца од пациентите во Софија вчера биле симнати од респиратор, а уште двајца ќе бидат симнати денес.

Таравари рече дека денес ќе бидат последните трансфери на пациенти во странство. Петмина повредени ќе заминат за Шведска и веќе нема потреба од лекувања во странство.

На лекување во Бугарија се 15 пациенти, во Србија 30, во Грција 12, во Турција 9, во Унгарија 6, во Австрија 6, во Хрватска 5, во Словенија 4, во Литванија 4, во Белгија 4, во Италија 4 и во Полска 2 пациенти.

Денес, од болница ќе бидат пуштени двајца од тројцата пациенти сместени во болницата во Штип, а министерот Таравари се надева дека во следните денови ќе има повеќемина што ќе си заминуваат дома.

Трагично загинатиот пејач на групата „ДНК“, Андреј Ѓоргиески ќе биде погребн утре, 20 март на градските гробишта во Бутел.

Информацијата со јавноста ја сподели сопругата на Андреј, Наталија.

Ковчегот ќе биде изложен во капелата во „Бутел“ во 10 часот.

Утре ќе биде погребот и на Сара Пројковска, членка на бендот „ДНК“.

„Погребот на нашата драга и сакана, непребол, вонреден професор м-р Сара Пројковска ќе биде утре, 20.3.2025, четврток, на гробиштата во Лисиче. Телото ќе биде изложено во црквата Св. Петар и Павле во Лисиче од 12 часот’, известија на социјалните мрежи од Факултетот за музичка уметност – Скопје.

Групата настапуваше во дискотеката во која ноќта помеѓу 15 и 16 март избувна пожар во кој загинаа 59 лица, а 155 се повредени.