Во рамките на Втората меѓувладина седница со Унгарија, министерот за надворешни работи и надворешна трговија, Тимчо Муцунски, денеска во Будимпешта оствари одвоена билатерална средба со министерот за надворешни работи и трговија на Унгарија, Петер Сијарто.

Централни теми на разговорите беа тридецениското пријателство и напредокот во севкупните билатерални односи, одличната трговска соработка, како и перспективите и предизвиците во процесот на европската интеграција на нашата земја.

Интензивната соработка што двете земји ја развиваат во изминатиот период е потврда за нивното стратешко партнерство и заедничката заложба за унапредување на дијалогот и натамошно динамизирање на секторската соработка. Посебно беа истакнати одличните економски врски, потврдени со фактот дека Унгарија е меѓу десетте најголеми трговски партнери и инвеститори во Северна Македонија.

На средбата беше нагласена континуираната и недвосмислена поддршка од Унгарија за европската интеграција на нашата земја, која беше особено видлива за време на неодамнешното унгарско претседателство со Советот на ЕУ. Со цел размена на експертиза во областа на ЕУ-интеграцијата, двајцата министри потпишаа акциски план за зајакнување на соработката преку пренесување на знаења и искуства во процесите на европската интеграција и економската дипломатија.

Во изјавите за медиумите, министрите Муцунски и Сијарто нагласија дека оваа средба и договорените активности дополнително ќе го зацврстат стратешкото пријателство и ќе отворат нови перспективи за соработка, како во билатералните односи, така и во мултилатералните формати.

„ Економската стабилност и развојот на државите, како и на Европската Унија, зависат од мирот и од проширувањето на Унијата со Западен Балкан. Денес, Унијата има поголем интерес од пристапувањето на земјите од регионот отколку што тие имаат интерес од Унијата. Се согласуваме дека членството во Унијата треба да биде врз основа на ‘мерит’ систем, но тој систем мора да важи подеднакво за сите, без да се воведуваат билатерални прашања како критериум за напредок. Унгарија отсекогаш ја поддржувала Северна Македонија на европскиот пат, а потпишувањето на денешниот акциски план е уште една потврда на таа заложба“, истакна унгарскиот министер Сијарто.

Упатувајќи благодарност за континуираната, пријателска и принципиелна поддршка што Унгарија ја дава на Северна Македонија во процесот на пристапување кон Европската Унија, како и за сојузништвото во рамките на НАТО, министерот Муцунски потенцираше дека соработката и заложбите за унапредување на отворената и искрена комуникација ќе продолжат да се развиваат.

„Заедничкиот состанок на владите на Северна Македонија и Унгарија е уште еден значаен момент за продлабочување на нашите односи, но и неопходна можност за стратешка координација во време на сериозни политички и безбедносни предизвици. Искрено верувам дека овој состанок е одлична можност за размена на мислења и ставови што значително ќе придонесат за унапредување на севкупната билатерална и мултилатерална соработка, како и за дополнително зајакнување на европскиот мир, безбедност и просперитет“, истакна министерот Муцунски во своето обраќање.

Во одговор на новинарско прашање, министерот Муцунски подвлече дека надворешната политика на нашата држава се заснова на три константи: полноправното членство во НАТО и активното учество како кредибилен член на Алијансата, целосната усогласеност со заедничката надворешна и безбедносна политика на Европската Унија, како и стратешкото партнерство со САД. „А пред сè и над сè – македонскиот национален интерес“, нагласи Муцунски.

„Сите одлуки донесени во изминатиот период се усогласени со овие принципи и во согласност со националниот интерес. Резолуцијата усвоена од Советот за безбедност на Обединетите Нации е правно обврзувачка и има за цел воспоставување мир. Секако, секој што мисли дека изнаоѓањето решение за конфликт од ваков обем може да се постигне без Соединетите Американски Држави има несериозен и неискрен пристап кон ова прашање.

Ние сме мала држава која има јасен интерес од мир во регионот, Европа и светот, и во согласност со тоа ќе дејствуваме. Секоја одлука што ќе ја носиме ќе биде во рамките на трите постулати на нашата надворешна политика, земајќи го предвид нашиот национален интерес и во консултација со нашите клучни и стратешки партнери“, заклучи Муцунски.

Дополнително, тој истакна дека со Унгарија споделуваме заеднички вредности и национални интереси, насочени кон мир, просперитет и подобар живот за нашите граѓани.

Апелациониот суд ја преиначи пресудата за случајот „Рекет“ во кој е обвинет Бојан Јовановски – Боки 13.

Боки 13 во 2020 година беше осуден на девет години затвор за кривични дела „примање награда за противзаконито влијание и перење пари“ во случајот „Рекет“.

Боки 13 во моментов е со условна затворска казна врз основа на медицинска документација. Некои лекари тврдат дека тој е инвалид од прв степен и не може да ја одлежи затворската казна. Судот ги прифати тие медицински наоди и му дозволи да остане на слобода.

Во 2023 година Јовановски беше опериран за отстранување на целиот стомак.

Сојузот на синдикатите на Македонија (ССМ), денес, до Владата, до Собранието и до работодавците достави предлог во кој бара дополнително зголемување на платите на работниците за 6.000 денари покрај редовното законско зголемување на минималната плата, кое треба да се случи месецов, а ќе влијае на зголемување на сите други плати. За да може работодавците во приватниот сектор да ги зголемат платите на работниците, ССМ бара државата да се откаже или да ги субвенционира придонесите за задолжително социјално осигурување, кои треба да се плаќаат на дополнителните 6.000 денари во период до 12 месеци. Доколку Владата не го прифати овој предлог, Слободан Трендафилов, претседател на ССМ, ги повика пратениците да го изгласаат оти е доставен и до нив.

„Она што го предлагаме денеска е пратениците, онака сложно како што беа сложни да ги зачуваат трошоците за превоз, да гласаат и за предлогот на Сојузот на синдикатите на Македонија за дополнително зголемување на минималната плата за 6.000 денари, што ќе значи и дополнително зголемување на сите други плати на работниците во Македонија“, рече Трендафилов.

Тоа што државата би се откажала од придонесите за задолжително социјално осигурување за дополнителните 6.000 денари, Трендафилов вели дека нема да го осиромаши буџетот оти е веќе предвидено законското покачување на минималната плата.

„Државата има планирано придонеси на нивно на системското покачување, она што бараме е Владата на непредвидените приходи од задолжителното социјално осигурување да се откаже во период од 12 месеци или да ги субвенционира за работодавците во приватниот сектор да може да ги зголемат платите на сите работници за најмалку стотина евра“, рече претседателот Трендафилов и нагласи дека парите од покачувањето што би го добиле работниците нема да завршат во банка, туку за основни прехранбени производи за кои данокот е од 5 до 18 проценти, пари што повторно ќе завршат во буџетот.

Со договорите за вработување или анексите за покачување на личниот доход од 6.000 денари во приватниот сектор платите ќе останат на истото ниво и по истекот на тие 12 месеци во кои се бара субвенција од државата или откажување од државата за задолжителните придонеси. Трендафилов вели дека значи речиси 40 отсто повторно ќе одат назад во буџетот како придонеси од задолжителното социјално осигурување, што ќе помогне работниците да затворат мал дел од дупката на Фондот за пензиско и инвалидско осигурување за редовното финансирање на исплатата на пензиите.

Трендафилов очекува до 15 март да бидат повикани на разговори за дополнителното покачување од 6.000 денари. Доколку тоа не се случи, не е исклучена можноста за штрајк.

„Упатувам порака до Владата и до работодавците еднострано да не одлучуваат за ваквиот предлог, особено поради фактот што и ние како претставници на работниците исто така еднострано можеме да одлучиме да го искористиме правото на штрајк“, вели Трендафилов.

ССМ потсети дека итно мора да се формира и комисија за утврдување репрезентативност, без која не може да се објави износот на минималната плата, која законски е предвидено да се покачи овој месец. Комисијата за репрезентативност е нефункционална оти се повлечени тројцата претставниц од Владата. Без нив комисијата не може да утврди репрезентативен претставник на работниците за преговори во Економско-социјалниот совет, каде што се преговара за зголемување на минималната плата, која значи зголемување и на сите други плати.