Седум мигранти од Авганистан биле пронајдени во автомобил „ауди А8“ кај патарината кај Градско.

Според информациите на полицијата, ноќеска околу 1:30 на автопатот Скопје – Гевгелија, во близина на Демир Капија, полициски службеници дале знак за запирање на две патнички возила „ауди А8“ и „фолксваген фејтон“, но возилата не застанале.

Околу 2:15 часот, според пријавеното, пред патарината кај Градско, било оставено возилото „ауди А8“. При преглед во возилото биле пронајдени седум мигранти од Авганистан.

Мигрантите се однесени во Прифатниот центар Винојуг – Гевгелија за понатамошна постапка. Се преземаат мерки за расчистување на случајот.

Основното јавно обвинителство Скопје донесе наредба за спроведување истражна постапка против 41-годишен скопски дилер на дрога.

Како што информираат од Обвинителството, во периодот од јуни до септември, во повеќе наврати, осомничениот 41-годишен скопјанец кај себе и во својот дом на булеварот Гоце Делчев држел наркотична дрога хероин и марихуана.

Притоа, при неколку полициски претреси, кај него биле пронајдени и одземени приближно 13 грама хероин и помали количества марихуана, како и смеса од кофеин и „парацетамол“.

Тој е осомничен за продолжено извршување на кривичното дело неовластено производство и пуштање во промет наркотични дроги, психотропни супстанции и прекурсори.

Ценејќи дека се исполнети законските основи, јавен обвинител до судија на претходна постапка при Основниот кривичен суд во Скопје доставил и предлог за определување мерка притвор за осомничениот.

Полициски службеници во координација со претставници од ЈП „Национални шуми“ и на Шумската полиција, вчера во атарот на с. Горна Бањица, Гостиварско, ги затекнале А. И. (47), А. Ќ. (43), М. С. (47) и К. Б. (51) од селото, кои на трактор товарале огревни дрва за кои не поседувале документи.

Сите четири лица биле лишени од слобода и задржани во Полициската станица Гостивар за расчистување и документирање на случајот, а возилото и дрвата ѝ биле предадени на Шумската полиција.