СВР Куманово поднесе кривична пријава против Д.Б.П.Л.(36) од Република Франција поради постоење основи на сомнение за сторено кривично дело ,,недозволено изработување, држење и тргување со оружје и распрскувачки материи“.

Полицијата извести дека на втори мај на граничниот премин Табановце во возилото „форд“ со кое управувал Французинот биле пронајдени и одземени куршуми калибар 22 мм, за кои не поседувал дозвола.

Одделението за безбедност на патниот сообраќај при СВР Скопје синоќа во периодот од 17.00 до 01.00 часот спроведе засилена сообраќајна контрола по оперативната акција “Безбеден сообраќај”. За време на сообраќајната контрола акцентот беше ставен на учесниците во сообраќајот кои управуваат мотоцикли и велосипеди со помошен мотор.
За време на контролата биле преземени мерки против 92 учесници во сообраќајот, од кои 50 санкции за возачи на мотоцикл. Од нив, 14 за возење мотоцикл без возачка дозвола, 14 санкции за возење без заштитна кацига, девет мерки за возење мотоцикл без положен испит, четири санкции за возење мотоцикл во несоодветна категорија,  две мерки за минување со мотоцикл на црвено светло, три санкции за непочитување на даден знак стоп од полициски службеник…
Акциските контроли во рамки на оперативната акција ќе продолжат и во наредниот период со засилен интензитет. Полицијата апелира до сите учесници во сообраќајот да ги почитуваат сообраќајните правила и прописи и со тоа да придонесе за побезбедни  патишта.

СВР Скопје поднесе кривична пријава против 22-годишниот А.С. од Скопје поради постоење основи на сомнение за сторено кривично дело „неовластено производство и пуштање во промет на наркотични дроги, психотропни супстанци и прекурзори“ и „неовластено изработување, држење, посредување и тргување со оружје или распрскувачки материи“.

На 07.05.2025, полициски службеници со судска наредба извршиле претрес во домот на пријавениот во Скопје, при што биле пронајдени и одземени кокаин, марихуана, пиштол „Чешка зброевка“ калибар 7,65 мм и куршуми калибар 7,65 мм, кои ги поседувал без дозвола.