Тројцата бегалци ќе заработат и кривични пријави оти украле мобилни телефони кои ги трампале за дрога

Полицијата по една седмица ги фати првите  бегалци од Воспитно поправниот дом во Велес. Деветнаесет годишните П.С. од Струга и Ј. П. од Битола и една година помладиот С.Р. од Радовиш се фатени во Охрид вчера околу 20 часот и 45 минути. Полицијата ги забележала на плоштадот Крушевска Република, во центарот на градот, во близина на чинарот. Тројцата штитеници,  на полицијата не се спротивставиле, но лажно се представиле. Но и покрај тоа тие биле приведени во полициската станица во Охрид.  Таму признале дека во Охрид пристигнале од Штип, потоа веднаш се упшатиле во Струга. Отишле во средното училиште Нико Нестор и до соблекувалната украле три мобилни телефони. По кражбата повторно се вратиле во Охрид, каде што се сретнале со еден нарко-дилер. Во замена за два мобилни телефона, дилерот им дал одредена количина хероин. СВР Охрид, по документирање на целиот настан, против тројцата бегалци ќе поднесе соодветна пријава и ќе бидат вратени во Воспитно поправниот дом во Велес. Инаку полицијата и натаму трага по другите тројца бегалци кои од поправниот дом избегаа три дена по првите тројца.