Тетовската полиција приведе двајца тетовци кои се осомничени дека го убиле нивниот 65-годишен сограѓанин Крсте Стерјоски, соопшти СВР Тетово.

Едниот од осомничените бил приведен околу пладне, а другиот попладнево. Во текот на денот се очекува приведените со соодветен поднесок да бидат изведени пред истражен судија, каде треба да кажат зошто го нападнале и убиле Стерјоски.

Тетовецот Крсте Стерјоски беше убиен ноќта меѓу саботата и неделата. Две лица на возраст од 21 и 22 години од Тетово, го нападнале, а од здобиените повреди, тој починал.

Нападот се случил во петокот меѓу 15 и 16 часот, на улица „Гоце Делчев“, во непосредна близина на православните гробишта во Тетово, при што Стеројски се здобил со сериозни повреди.

Веднаш по нападот повредениот со возило бил однесен во Тетовската клиничка болница, каде му била укажана лекарска помош, но заради сериозноста на повредите итно бил префрлен на Скопските клиники каде починал.

Обдукцијата била извршена во неделата.

Стерјоски долго време работел во Швајцарија и покрај македонско, имал и швајцарско државјанство, а во родниот град се вратил пред неколку години по што почнал сопствен бизнис./крај/со/фф