Наталожени саѓи во нечист, неисправен оџачки канал кој имал недостатоци, е причина за пожарот кој ги опустоши конаците во манастирот Трескавец крај Прилеп, покажуваат извештаите на вештаците.

Според извештаите, пожарот избувнал во гостинска соба којашто била сместена до манастирската камбанарија.

Во таа просторија викендот имало гости, најверојатно интензивно и прекумерно се ложела печката на дрва. Прво од саѓите и смолите се запалил подот, веднаш од таа пожарот се пренел во соседната просторија и за 20-тина минути се проширил секаде. Пожарот избувнал во 13 часот, за петнаесеттина минути се проширил со силен интензитет“, рече портпаролот на судот Жарко Велески.

Ветерот кој дувал од западен правец помогнал огнот експресно да се прошири. Вештаците ја отфрлаат можноста дека причина за пожарот била електрична инсталација.

Со реконструкцијата на манастирот во 1990 година, исто така, по големиот пожар, не биле применети мерки за заштита од пожар и немало елаборат за тоа. Прилепското јавно обвинителство за тоа дали станува збор за несреќен случај или ќе има одговорност за избувнувањето на пожарот, ќе се изјасни кога ќе ја добијат комплетната документација./крај/мф/