Полицијата се уште трага по десетмината напаѓачи кои во четвртокот околу 19 часот во Синѓелиќ, маскирани и вооружени претепаа шестмина малолетници во автобусот број 65.

Министерката за внатрешни работи, Гордана Јанкулоска изјави дека полицијата ги презема сите мерки за расчистување на инцидентот во автобусот 65, но и другите инциденти на автобуските состојби.

Ваквите инциденти во автобусите постојано се повторуваат, а според министерката ова не е само прашање на безбедност, туку за ова е потребна сеопфатна социолошка анализа.

Министерката не открива детали во корист на истрагата, а мотивите на насилството не коментира се додека не се фатат напаѓачите Денеска таа има состанок со претставници на општината на којшто ќе се разгледува можноста за зголемено полициско присуство, по барањето на жителите на Стајковци за полициска станица во ова село.

Тие побараа полицијата да ги најде насилниците. Претепаните деца од Стајковци, Булачани, Црешево, Раштак се пуштени на домашно лекување.

Во четвртокот вечерта околу 19 часот во автобус број 65 на автобуската постојка во близина на црквата во село Сингелиќ влегле 10-15 маскирани лица и со метални шипки нападнале патници во автобусот.

При излегувањето насилниците се обиделе да извлечат едно малолетно лице од автобусот но не успеале.

Уште два инциденти се регистрирани во текот на вчерашниот ден. Едниот се случил во автобус број 33, на автобуска постојка на улица „Трета македонска бригада“, кога десетина лица нападнале 17-годишен малолетник. Другиот инцидент се случил на булевар „Борис Трајковски“ кога, едно лице нападнало двајца 16-годишници./крај/мвр