Нов обид на велешкиот гинеколог Панче Арсов да докаже дека не е виновен за смртта на родилката Бојана Игнова, иако за делото Судот го прогласи за виновен и одлежа една година затвор.

Сега, откако ја има експертизата направена од Медицинскиот факултет во Љубљана, вели дека вистината излегла на виделина. Вината не е негова, тврди тој, одговорноста е во болницата која немала ангажирано 24 часа анестезиолог, јавува порталот Лисица.

„Од медицинската документација се гледа дека д-р Панче Арсов, го водел породувањето на покојната Бојанка Игнова во согласност со стручната доктрина и во согласност со објективните можности во дадената ситуација“, се вели во експертизата која денеска на новинарите им ја подели др.Арсов.

Во седумгодишниот судски спор Арсов барал вакво вештачење, но судот ценел дека е доволно само вештачењето на Институтот за судска медицина и супер вештачењето на судско медицинскиот одбор на Медицинскиот факултет.

„Судска медицина е институција која кажува за причината за смртта, а не за работата моја или за било кој друг доктор во специјалноста која постои“, рече др. Арсов.

Арсов поднел барање до Основниот суд во Велес за повторно отварање на случајот во кој тој беше прогласен за виновен. Сега на ред е судот. Тој до крајот на оваа година треба да се произнесе дали барањето се прифаќа или одбива. /крај/лсц/мф