Скопското Обвинителство отвори истрага против едно лице за обид за убиство во селото Арнакија.

На 30 август минатата година осомничениот пред кафе-бар на влезот во селото Арнакија со умисла се обидел да убие едно лице. Според информациите од Обвинителството, тој заедно со уште едно лице застанал со автомобил „фолксваген голф“ на автобуската станица во селото и почнале вербална расправија со трето лице, кој е сведок во истрагата.

Двајцата излегле од возилото држејќи пиштоли во рацете по што сведокот почнал да бега. Оштетениот го видел настанот и се обидел да ја смири ситуацијата повикувајќи ги да застанат. На ова осомничениот испукал кон него 3-4 проектили од пиштолот и му нанел три огнострелни повреди.

Повредениот почнал да бега, а осомничениот се впуштил кон него и испукал уште неколку проектили, но не успеал да го погоди. Кога на местото се собрале и поголем број други луѓе, двајцата вооружени побегнале. По настанот, осомничениот повеќе од четири месеци бил недостапен за органите на прогонот.

Бидејќи постојат околности што упатуваат на опасност од бегство, можност осомничениот да го повтори или да го доврши кривичното дело, како и да влијае врз сведоците во постапката, јавниот обвинител до судот достави предлог за определување мерка притвор.​

Основното јавно обвинителство Скопје отвори истрага против жител на Скопје за неовластено производство и пуштање во промет наркотични дроги, психотропни супстанции и прекурсори.

Осомничениот 25-годишник од непознато лице набавил марихуана со вкупна нето-маса од 123 грама, која ја чувал во куќата на својот дедо. Дрогата ја препакувал во 23 помали полиетиленски пакувања со намера да ја продава. При претресот кај него била пронајдена и дигитална вага со остатоци од наркотична дрога.

Јавен обвинител до судот поднесе предлог за определување мерка притвор за осомничениот.​

Скопјанец во четвртокот бил нападнат од две лица пред својата куќа на улицата Борис Трајковски.  Од полицијата потврдуваат дека лицето било физички нападнато со тврд предмет, а скопјанецот рекол дека напаѓачите биле лица што ги познавал од претходно и со кои веќе имал проблеми.

По настанот, лицето било пренесено во комплексот клиники „Мајка Тереза“, каде што му биле констатирани тешки телесни повреди. За настанот е известен јавен обвинител и се преземаат мерки за расчистување на случајот.