Осумчлена криминална група вршела нелегални ископувања на стари гробови и археолошки локалитети во Валандовско-гевгелискиот регион и на други локации низ државата, а пронајдените предмети со културно-историска и археолошка вредност како и иконите со непроценлива вредност ги продавале во Македонија и странство, соопшти министерката за внатрешни работи, Гордана Јанкулоска.

Акцијата „Аполон” во која во четврток (20 март) беа уапсени седум лица од Македонија и еден државјанин на Бугарија е продолжение на дејствијата преземени во рамки на акцијата „Фаланга”.

Криминалната група од почетокот на 2013 година од археолошки локалитети на територијата на Валандовско-гевгелискиот регион и на други локации на територијата на Македонија вршела нелегални ископувања на предмети со културно-историска и археолошка вредност, нивно присвојување и илегално продавање во Македонија и странство, како и продажба на икони со непроценлива вредност за културното наследство на Македонија, за кое МВР се сомнева дека потекнуваат од зачестените кражби во цркви во текот на изминатиот период.

Еден од нив бил одговорен за посредување при продажба на археолошките предмети, а останатите припадници на криминалната група биле задолжени на подрачјето на Валандово и Гевгелија да организираат помали групи од лица кои ги вршеле нелегалните ископувања.

Во текот на вчерашниот ден полицијата извршила претрес на дом и други простории на седум локации во Гевгелија и на по една локација во Струмица и Валандово, при што пронајдени се: икони, различни археолошки фигури, фибули, делови од накит, метални парички, керамички садови, скенер со мала и голема сонда со камера, метал детектор, разни метални сонди, тефтери со записи и скици од археолошки локации, разни мапи, фотографии од артефакти, цедиња со артефакти, пиштол, револвери, пушка и муниција

Полицијата поднесе кривична пријава против осумте лица на возраст од 46 до 63 години, поради постоење на основано сомнение за сторени кривични дела „злосторничко здружување”, „тешка кражба”, „оштетување или уништување културно наследство”, „отуѓување на културно наследство од особено значење во државна сопственост”, „прикривање” и „помагање”.

Предметите пронајдени при претресите, ќе бидат предадени за понатамошно вештачење и стручна идентификација.крај/мф/сд