Основното јавно обвинителство Скопје поднесе обвинение против две лица, кои како соизвршители сториле продолжено кривично дело тешка кражба.

Обвинетите скопјани на возраст од 27 и 43 години, на 2 јули 2020 година, околу 1 часот по полноќ, со погоден алат –- токмак го искршиле долниот дел од заштитниот ѕид на затворена просторија од магацин – тезга и одзеле туѓи подвижни предмети, облека, во вкупна вредност од 21.420,00 денари. Истиот ден, околу 3 часот, го провалиле и магацинот – тезга на второоштетената, од каде што, со намера противправно да ја присвојат, одзеле облека во вкупна вредност од 180.480,00 денари.

При напуштање на местото со украдената облека спакувана во најлонски кеси, обвинетите биле фатени од надлежни полициски службеници.

Со поднесениот обвинителен предлог јавниот обвинител до Основниот кривичен суд Скопје достави и предлог за продолжување на веќе определената мерка притвор за едно од обвинетите лица, а за другото обвинето лице предлог за продолжување на веќе определената мерка куќен притвор бидејќи постои опасност од бегство на обвинетите и можност за попречување на натамошната постапка.

Синоќа, по полноќ, во полиција било пријавено дека на локалниот пат меѓу селата Стојаково и Богородица се случила сообраќајна незгода, во која починал 54-годишник од Стојаково.

Според информациите, тој управувал автомобил „сеат леон“, со гевгелиски регистарски ознаки, во кој како сопатник се превезувала и неговата сопруга, и во еден момент излетал од патот.

По пристигнувањето на екипата на итната медицинска помош, тој починал.

Од страна на екипа од полициската станица Гевгелија извршен бил увид на местото на незгодата, а по наредба на јавен обвинител телото на починатиот било дадено за обдукција.

Во регионот на Кавадарици синоќа и рано утрово се случиле две одделни сообраќајни несреќи, во кои животите ги загубиле двајца трактористи на возраст од 33 и 69 години.

Синоќа, околу 21.15 часот, на регионалниот пат Кавадарци – село Росоман се случила сообраќајна несреќа помеѓу автомобил „пежо“, управуван од П. М. (38), и трактор, управуван од М. З. (33), двајцата од Кавадарци.

Во незгодата починал возачот на тракторот, а возачот и сопатничката од автомобилот добиле телесни повреди.

Втората незгода се случила рано утрово (9 јули), а во полиција било пријавено дека на влезот во Кавадарци 69-годишник, управувајќи трактор, изгубил контрола и се превртел, при што починал на местото.