Црна хроника
МВР: Лицето Д.С. бегајќи од една предизвикало друга сообраќајка, па побегнало пешки
Министерството за внатрешни работи во саботата излезе со официјално и детално соопштение за јавноста за синоќешната сообраќајна несреќа во скопската населба Тафталиџе, за којашто медиумите повикувајќи се на очевидци и полициски извори тврдат дека станува збор за дополнителниот министер за труд и социјална политика Диме Спасов, во која се откриваат бизарни поединости од инцидентот.
Забележливо е меѓутоа, што иако според прописите и вообичаената практика во полицискиот билтен лицата се наведени со иницијалите, отсуствуваат вообичаените податоци за возраста и местото на живеење.
Во соопштението се наведува дека во петокот на 28-ти октомври, во 23:20 часот лицето идентификувано со иницијалите Е.А. на телефонскиот број за помош 192 пријавил дека во Градскиот парк во Скопје, движејќи се по сервисната улица кон хотел „Парк“ со своето возило „фолксваген“ со скопски регистарски таблици коешто лично го управувал, бил удрен од возило „туарег“ со скопски регистарски таблички кое доаѓало од спротивен правец.
Поради тоа што возачот на „туарегот“ по сударот не застанал, туку се дал во бегство, Е.А. со својот автомобил тргнал во потера по џипот. Но возачот на „туарег“-от продолжил да се движи по улицата „Франклин Рузвелт“, по што свртел десно по улицата „М.Т.Гологанов“, па потоа по улицата „Њуделхиска“, каде што предизвикал и втора сообраќајна незгода удирајќи во апркиран автомобил „рено“ со скопски регистарски таблици, и повторно, без да застане, продолжил кон улицата „Алжирска“, каде бил сопрен од полициска патрола, којашто веќе била алармирана.
Од страна на полициски службеници лично и непосредно било утврдено дека од возилото „туарег“, кое е во сопственост на Агенцијата за вработување, излегле Д.С. и сопатничката Т.К..
Лицето идентификувано со иницијалите Д.С. на полицискиот службеник му кажал дека тој го управувал возилото, по што од страна на полицискиот службеник била известена Единицата за информирање и командување.
За време на утврдувањето на идентитетот на сопатничката, лицето кое го управувало возилото Д. С. разговарало на мобилен телефон и се оддалечило од возилото на неколку метри, по што со трчање се дало во бегство во правец на улицата „Дрезденска“. Од страна на полицајци заедно со тимови од единицата „Алфа“ биле извршени обиколки во непосредната околина, но лицето не било пронајдено односно успеало да избега.
Меѓутоа, околу 2 часот на улицата „Алжирска“, односно на местото каде што било оставен „туарег“-от дошоло лице идентификувано како М. Т. и на полициските службеници им пренел дека возилото било управувано од негова страна. Меѓутоа, од дадената изјава на ова лице, полицијата констатира дека тоа недоволно ги познавало околностите под кои се случиле двете сообраќајни незгоди, што наведува на заклучок дека тој не го управувал возилото.
Изјавата на М.Т., исто така, не кореспондира со изјавата на сопатничката и утврдената фактичка состојба на лице место од страна на полициските службеници коишто констатирале дека во возилото се наоѓале само лицата Д.С. и Т. К. Имено, ова лице не знаело да каже каде се случила првата сообраќајка, како и по која рута се движело возилото до местото на вториот инцидент.
Според сознанијата на медиумите, лицето коешто се пријавило како сторител на незгодата, е личниот возач на министерот Спасов, вработен Минисерството за труд и социјална политика.
Од МВР додаваат дека работат на комплетно расчистување на околносите околу случените сообраќајни незгоди, за што јавноста ќе биде соодветно информирана.
Како што е веќе објавено, синоќа на улицата Алжирска се случила сообраќајка во која учествувал црн „туарег“, кој удрил во неколку паркирани возила. Според пишувањата на повеќето медиуми и сведочења, возачот наводно бил Диме Спасов, дополнителниот министер за труд, кој наводно бил пијан и го управувал службеното возило, кое наводно било сопственост на Агенцијата за вработување.
Според одредени сознанија полицијата кај Спасов извршила тестирање за евентуално присуство на алкохол и психотропни супстанци, а резултатите би требало да бидат објавени во текот на денот. Исто така, извори наведоа дека Спасов не се појавил во саботата до раните попладневни часови на распит во сообраќајната полиција./крај/мф
Извор: Макфакс
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Црна хроника
Нападнати деца на училиште, во автобус, градинка – во Скопје пријавени повеќе случаи на насилство со малолетници за еден ден
Во текот на вчерашниот ден во полицијата биле пријавени неколку случаи на физички напади, најголем дел врз малолетни лица, кои се случиле на различни локации во главниот град. Надлежните служби преземаат мерки за расчистување на сите случаи.
Напад во автобус на ЈСП
Татко пријавил дека вчера неговиот малолетен син бил физички нападнат од неколку малолетници од селото Батинци, додека се возел во автобус на Јавното сообраќајно претпријатие на подрачјето на Драчево.
Младо момче нападнато од малолетници
Дваесет и шест годишниот С.Т. Зелениково пријавил дека околу 23:10 часот, во паркот во село Пакошево бил физички нападнат од двајца малолетници, кои употребиле тврд предмет. Тој се здобил со тешки телесни повреди, констатирани во Комплексот клиники „Мајка Тереза“ во Скопје.
Инцидент во средно училиште во Центар
Во 21:15 часот, Ж.П. (47) од Скопје пријавил дека околу 12:00 часот, во двор на средно училиште на подрачјето на Центар, неговиот 16-годишен син бил нападнат од друг ученик.
Напад во градинка во Чаир
Во 13:00 часот, Н.Ќ. (49) од с. Страхојадица, општина Зелениково, пријавил дека околу 12:30 часот, во двор од градинка на подрачјето на Чаир, неговиот малолетен син бил физички нападнат од неколку други малолетници.
Напад во Кисела Вода
Во 22:30 часот, Н.Ц. (46) од Скопје пријавила дека околу 20:30 часот, нејзиниот 15-годишен син бил физички нападнат од женско лице на подрачјето на Кисела Вода.
Од Министерството за внатрешни работи информираат дека за сите случаи се преземаат мерки за расчистување.
Црна хроника
Возило удри во 7-годишно девојче во Куманово, со повреди донесено на Клиника
Во текот на вчерашниот ден на булеварот Октомвриска Револуција во Куманово, автомобил „фолксваген голф“ со кумановски регистарски ознаки удрил во седумгодишно девојче од Куманово.
Како што соопшти МВР, возилото го управувала 23-годишната С.В. од Куманово.
Во несреќата девојчето се здобило со тешки телесни повреди, кои биле констатирани во Комплексот клиники „Мајка Тереза“ во Скопје.
Увид на местото на несреќата извршила полициска екипа.
Црна хроника
(Фото) Експлозија во куќа во охридско, тешко повредено едно лице
Едно лице е повредено во експлозија што се случила денеска во охридското село Велгошти, информира територијалната противпожарна единица Охрид.
„Во текот на денешниот ден ТППЕ Охрид , интервенираше на санирање на последиците од разорна експлозија во куќа во Охрид,с.Велгошти. Експлозијата е предизвикана од зголемена концентрација на гасови ( плин ) и останати фактори, кои допринеле за високо ниво на експлозивност. Благодарение на брзата реакција на пожарникарите спречено е и опожарување на објектот. Повредена е и 1 жена која е преземена од екипите на брза помош“, соопшти противпожарната служба.
Од полицијата соопштија дека пожарот се случил околу 11 часот и дека тешко е повредена 44-годишна жена.
„На 06.02.2026 година во 10.58 часот, во СВР Охрид е пријавено дека избувнал пожар во куќа во охридското село Велгошти при што, Е.Т.Ѓ.(44) од истото село се здобила со тешки телесни повреди, констатирани во Општата болница во Охрид. Интервенирала Територијалната противпожарна единица од Охрид. Се преземаат мерки за утврдување на причините за пожарот“, соопшти СВР Охрид.

