Полициски службеници од СВР Охрид на полноќ на брегот на Охридското Езеро, кај Пештани, пронајдоа четири мрежи со уловени 74 парчиња риба белвица, кои се одземени и предадени на Хидробиолошки завод Охрид.

СВР Охрид презема мерки за пронаоѓање на лицата кои се сторители на казненото дело незаконит риболов, против кои ќе поднесе соодветна пријава, се вели во соопштението.

Четириесетгодишен тетовец е тешко повреден откако во него пукале двајца мажи од Тетовско. Инцидентот се случил по куса расправија, по што двајцата мажи испукале неколку куршуми кон сега повредениот и побегнале.

Настанот го пријавила сопругата на повредениот маж, која била сведок на нападот.

Повредениот Ш.М. веднаш бил пренесен во Клиничкиот центар Тетово, каде што му биле констатирани тешки повреди.

Увид на местото на настанот извршила екипа од СВР Тетово, при што се пронајдени и подигнати три чаури и еден проектил од автоматска пушка. Се преземаат мерки за расчистување на случајот.

Автомобил удрил во 69-годишна жена и 10-годишно дете од Радовиш. Во несреќата, која се случила вчера на булеварот Александар Македонски во Радовиш, со тешки телесни повреди се здобило девојчето, а со телесни повреди се здобила П.Б., констатирани во ЈЗУ-Радовиш, каде биле пренесени за укажување лекарска помош.

Извршен бил увид на местото на незгодата од увидна екипа од Полициската станица Радовиш.