Педесет и осумгодишен жител на делчевското село Звегор натепал вработен во Државниот инспекторат за транспорт, додека му вршел контрола на возилото, при што му нанел тешка повреда.

Како што се наведува, инцидентот се случил на 12.02.2020 година на граничниот премин „Делчево“, за време на редовна контрола.

Надворешната канцеларија за криминалистички работи Делчево поднесе кривична пријава против Д.Г.(58) поради постоење основи на сомнение за сторени кривични дела „спречување на службено лице во вршење на службено дејствие“ и „тешка телесна повреда“.

Сопственик на градежна фирма во Прилеп извршил даноќно затајување во периодот од 1.1.2018 до 31.1.2018 година, поради што доби кривична пријава од Одделението за внатрешни работи Прилеп.

Како што се наведува, пријавениот на 16.01.2017 во Централниот регистар основал и регистрирал фирма за градежништво, проектирање и услуги од Прилеп, со дејност изградба на станбени и нестанбени згради. Со намера да ја избегне обврската за плаќање даночни обврски кон Управата за јавни приходи (данок на додадена вредност-ДДВ и персонален данок на доход-ПДД), во периодот од 1.1.2018 до 31.1.2018 остварил приход од промет на услуги во висина од 4.666.450 денари, кој не го евидентирал во сметководствените евиденции на фирмата, ниту во даночните пријави за 2018. На ваков начин пријавениот ја одбегнал законската обврска да го евидентира, пријави и плати ДДВ во износ од 839.961 денари и ПДД во износ од 382.648 денари, со што го оштетил буџетот на УЈП во вкупен износ од 1.222.609 денари.

Во текот на 2018 пријавениот склучил два договори за градба и уште шест усни договори за градежни работи, за кои средствата од паричниот надомест за извршената услуга кај еден договор се уплатени на трансакциска сметка на пријавениот, а не на трансакциската сметка на правното лице. За останатите извршени услуги за градежни работи, на основа на устен договор, наплатата ја вршел во готово, на рака, односно не ги евидентирал како приход уплатен на сметката на правниот субјект. Фирмата била регистрирана како тромесечен даночен обврзник и пријавениот преку овластен сметководител изготвувал и поднесувал до УЈП даночни пријави за ДДВ.

Седумина штипјани постапиле спротивно на одлуката на Владата за забрана и посебен режим на движење на населението од 21 до 5 часот и во време на забрана на движењето во вечерните часови се движеле пеш или со возила низ градот.​

Еден од нив, државјанин на Република Грција, со привремено живеалиште во Штип, требало да биде во задолжителна самоизолација во согласност со донесените мерки за сузбивање на заразната болест Ковид-19. Тој во земјата влегол на Меѓународниот аеродром „Скопје“ на 17.3.2020 година, при што потпишал изјава за самоизолација, која требало да ја почитува во следните 14 дена. Но, во периодот од 17 до 19 март обвинетиот го напуштил своето престојувалиште и бил во својата канцеларија во градот.

Основното јавно обвинителство Штип со поднесените предлози за издавање казнени налози на надлежниот суд му предложи за седум обвинети, кои не го почитувале полицискиот час, да изрече парична казна во висина од 100 дневни глоби, секоја од нив од 20 евра во денарска противвредност. За обвинетиот, кој не постапил според должноста за самоизолација, Обвинителството му предложи на судот да му биде изречена парична казна во висина од 100 дневни глоби, секоја од нив од 30 евра во денарска противвредност.​