Вчерашната фудбалска вечер помина без лекарски интервенции

Според информациите од дежурните екипи, во текот на вчерашната вечер, при одржувањето на Суперкупот на УЕФА, не е регистрирано зголемување на вообичаениот број интервенции, соопшти Министерството за здравство.

На Клиниката за токсикологија не е примен ниту еден пациент, во Службата за итна медицинска помош не се регистрирани колапси, а само еден странски државјанин со скршеница на раката е транспортиран во Клиниката за хируршки болести „Св. Наум Охридски“.

И од Ургентниот центар во комплексот клиники информираат дека ноќта поминала мирно и без зголемен број интервенции.

Оваа состојба, велат од Министерството, покажува зголемена свесност кај граѓаните и почитување на здравствените препораки.