Денеска Врховен ќе одлучува за „судбината на бомбите“ на СЈО

Врховниот суд за денеска го закажал продолжението на општата седница на која ќе се разгледуваат двата реферати на првиот човек на највисокиот суд во државата, Јово Вангеловски, дознава Макфакс. На седницата треба да се расправа за тоа дали прислушуваните материјали можат да бидат користени во доказната постапка и за барањето за заштита на законитоста поднесено од државниот јавен обвинител Марко Зврлевски, околу притворот на бизнисменот Сеад Кочан.

Продолжението на седницата беше одложено на неодредено време, поради болест на неколку судии. Макфакс дознава дека судиите Лидија Неделкова и Исамедин Лимани нема да учествуваат во расправата, заради тоа што поранешната судијка е веќе изземена од Кривичниот совет кој треба да одлучува по предмет на СЈО, а нејзиниот колега се повлекол самиот, затоа што има ќерка вработена во обвинителството на Јанева.

Вангеловски во првиот реферат сугерира исклучување на прислушуваните разговори како доказ во постапките. Како аргумент, користи две претохдни постапки во кои Врховен наложил да се отстранат докази бидејќи биле незаконски, меѓу нив, eдната е против поранешниот градоначалник на општината Аеродром, Кирил Тодоровски. Но, тогаш прислушуваните разговори биле одбиени како доказ бидејќи осудените прво биле под истрага за потешки кривични дела, а биле осудени за кривични дела за кои не е дозволено прислушување.

Првиот човек на Врховен им посочува на неговите колеги дека Законот за СЈО стапил покасно во правна сила од Законот за кривична постапка и спрема тоа, законодавецот можел тоа да го предвиди како посебен член. Вангеловски посочува дека јавниот обвинител е државен орган, додека Законот за СЈО пропишува само гонење на сторители на кривични дела.

Расправата по овие две точки предзвика жестока дебата на седницата што започна пред Велигденските празници, поради спротиставените мислења на судиите. Дел сметаат дека право да поднесува барање за заштита на законитоста има само специјалната обвинителка Катица Јанева заради автономниот статус одреден во Законот за СЈО, додека останатите се повикуваат на Законот за кривична постапка, во кој единствено право да го поднесува овој вонреден правен лек има само државниот јавен обвинител.

Васко Маглешов