За Заев Македонија е голем добитник на самитот во Трст

Премиерот Зоран Заев порача од Трст дека се уште не може да ги објави конечните бројки, но Македонија на самитот на лидерите на Западен Балкан и на ЕУ е голем добитник.

„ Процесите што денеска треба да бидат објавени  како  резултат во делот на  конкретна поддршка за изградба на инфраструктура се многу значајни за идните економски и, пред сè, за севкупните перспективи на поврзување на Македонија во регионот и во Европа,“ порача Заев, па додаде:

„За нас, за  Македонија, ова е навистина важен настан. Самитот во Трст зборува за перспективите на целиот регион кон Европската унија, но и за регионалното поврзување на Западниот Балкан. Јас сум многу среќен заради тоа што сите овие состаноци  оставаат сериозен впечаток дека има одлична европска перспектива за Македонија и за регионот“.

Според негова оценка по Трст ќе се зголеми комуникативноста, поврзувањето, транспортот, соработката и економијата  помеѓу сите овие земји, а наедно и ќе се испрати дополнителен  силен сигнал кон европските институции да го насочат фокусот повеќе кон самиот регион.