За „Порше 959 Спорт“ на аукција ќе се бараат два милиона евра

Компанијата „Порше“ во својата историја досега произвела вкупно 292 примероци од легендарниот модел „959“, но само 29 од нив биле произведени во верзијата „Спорт“.

Токму едно „Порше 959 Спорт“ ќе се најде на продажна аукција, што аукциската куќа „Сотби“ ќе ја организира на 8 февруари во Париз. Тоа ќе биде можност вљубениците во автомобили со „подлабок џеб“ и богатите колекционери да наддаваат за овој редок автомобил од 80-тите години на 20 век.

Организаторот на аукцијата тврди дека автомобилот е во оригиналната состојба и дека на себе ја има првата фарба.

Возилото од фабричките ленти било симнато во 1988 година. Како еден од 29-те модели „Порше 959 Спорт“, понудениот примерок е полесен од стандардната верзија „959 Комфорт“ за околу 100 килограми.

Автомобилот за погон користи 2.85-литарски шестцилиндерски би-турбо мотор со 515 коњски сили, а силата се пренесува врз двете осовини со помош на шестбрзински мануелен менувач.

Благодарение на ваквите спецификации „Порше 959 Спорт“ во своето време беше најбрзиот автомобил што можеше да се вози на јавните патишта. Титулата ја официјализира во мај 1987 година, кога на една делница од германскиот автобан, разви брзина од 317 километри на час.

Една година подоцна, на тест патеката Нардо постигна брзина од дури 339 километри на час, што и три децении подоцна е импресивен резултат.

Проценката е дека примерокот што во февруари ќе се најде на аукцијата во Париз ќе достигне цена од меѓу 1,5 и два милиона евра, но нема да биде изненадување доколку и ја надмине горната наведена сума.