Могерини реши да го покани Заев на средбата со лидерите од Западен Балкан

Високата претставничка за надворешна и безбедносна политика на ЕУ, Федерика Могерини, ја реши дилемата околу тоа кој в среда во Брисел ќе присуствува на вечерата со неа и другите лидери од Западен Балкан. Според информациите на Макфакс од дипломатски извори во Брисел, Могерини дефинитивно го поканила лидерот на СДСМ и нов мандатор, Зоран Заев, да дојде во Брисел и да присуствува на овој настан.

Изборот на претставникот од Македонија не беше единствен проблем за Могерини, бидејќи сè уште не се знае ниту кој ќе дојде од Косово и од Србија, и покрај тоа што Александар Вучиќ тукушто беше избран на претседател и е актуелен српски премиер.

Состанокот ќе се одржи в среда попладне, ќе биде неформален и по него ќе следи официјална изјава на Могерини. Ова ќе биде и официјална политичка промоција на Заев во Брисел и прва на меѓународен план откако го доби мандатот.

Средбата ќе се случи на ден пред доаѓањето на американскиот претседател Доналд Трамп во ЕУ и на самитот во НАТО.

Од Брисел за Макфакс, Слободанка Јовановска