Daily news
Началникот на Генералштабот на АРМ во официјална посета на војската на Црна Гора

Началникот на Генералштабот на Армијата на Република Македонија генерал, потполковник Методија Величковски, во рамки на активностите на тридневниот престој во Црна Гора во текот на денешниот ден оствари средби на највисоко воено ниво во Министерството за одбрана и Генералштабот на војската на Црна Гора.
По приемот со високи воени почести, генералот Величковски имаше средба со началникот на генералштабот на војската на Црна Гора, генерал-потполковник Љубиша Јокиќ, по што сe одржа состанок помеѓу делегацијата на АРМ и претставници од ГШ на војската на Црна Гора.
На средбата помеѓу началниците на Генералштабови, се опфатија повеќе прашања меѓу кои и збогатување на постоечката билатерална воена соработка во областа на обуката и военото образование, како и разгледување на можностите за нови облици на соработка преку изведување на заедничка обука и користење на капацитетите на армискиот полигон Криволак.
Генералите Величковски и Јокиќ изразија увереност дека приемот во НАТО на Црна Гора, која е веќе 29. полноправна земја членка на овој воено политички сојуз, ќе претставува позитивен сигнал и понатамошна безрезервна поддршка за нашите аспирации за членство во НАТО, а со тоа и зајакнување на безбедноста во регионот.
Овие заложби беа повторени и за време на состанокот на делегацијата на АРМ со министерот за одбрана Предраг Бошковиќ, на кој присуствуваше и вршителот на должноста амбасадор на Р Македонија во Црна Гора, Сухена Ќерими Балиу. На состанокот беше потенцирана и потребата за продлабочување на партнерската соработка помеѓу Армијата на Република Македонија и војската на Црна Гора во повеќе сегменти на одбраната.
Од страна на соговорниците на денешните средби беа искажани пофални зборови за улогата и начинот на кој АРМ се справуваше со миграциската криза, со што е придонесено и за намалување на овој вид безбедносен ризик за целиот регион.
Делегацијата на АРМ во текот на денот оствари посета на воздухопловната единица во воената база Голубовци во близина на Подгорица, каде се разгледуваа можностите за проширување на постоечката соработка во овој сегмент.
За време на престојот во Црна Гора во текот на утрешниот ден делегацијата ќе присуствува на денот за високи гости и церемонијата на затворање на вежбата „Заеднички предизвик 2017“ на која заедно со припадници на армиите на Австрија и Црна Гора учествуваат 36 припадници на АРМ од составот на полкот за специјални намени.
Соработката помеѓу АРМ со војската на Црна Гора во досегашниот период е изразена преку повеќе активности, како заедничка обука меѓу припадниците на двете армии на полето на военото воздухопловство, и обука на специјалните сили, но и во военото образование при што питомци од Црна Гора се образуваат на Воената академија во Република Македонија „Генерал Михајло Апостолски“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Daily news
Прва правна конференција Tres Partes

На 26 декември година во хотелот „Континентал“, со почеток во 10 часот, ќе се одржи првата правна конференција Tres partes, во организација на „Јанаки знае“, а ќе биде поделена во три дела.
Првиот дел е со работен наслов „Дали е потребно укинување на извршителите?”, на кој ќе учествуваат Зоран Василевски, кој ќе ја застапува тезата ПРО укинување на извршителите, извршител Снежана Андреевска, која ќе ја застапува тезата КОНТРА укинување на извршителите и извршител и поранешен судија за извршување, Христо Јованов, кој ќе предава во делот на извршувањето пред да се укинат судиите извршители.
Вториот дел е со работен наслов „Дали се шаблонизира институтот надомест на нематеријална штета“, на која предавачи ќе бидат адвокатката Маруша Митровска, судијката Љубица Колиќ од Основен суд Скопје 2 и судијата Ѓорѓи Радојков од Апелациониот суд Скопје.
Третиот т.н. кривичен дел е со работен наслов „Неприменување на кривично-правните институти“, во кој предавачи ќе бидат адвокатот Јанаки Митровски, Никола Тупанчевски, редовен професор по казнено право при „Јустинијан Први“, Александра Деаноска, вонредна професорка по казнено право при „Јустинијан Први“, и Оља Ристова, судијка при Основниот суд Скопје 1.
Предвиден е и интерактивен дел со публиката преку поставување прашања и коментари од учесниците.
Daily news
Груевски оди во затвор – Апелација му ја потврди казната

Апелациониот суд Скопје, постапувајќи по кривичниот предмет познат во јавноста под името „Тенк“ по одржана јавна седница, донесе пресуда со која му ја потврди двегодишната затворска казна на премиерот Никола Груевски. „Жалбите на обвинетиот Никола Груевски изјавени лично и преку неговите бранители ги одби како неосновани, а првостепената пресуда ја потврди во целост, со што му ги потврди двете години затворска казна“, пишува во соопштението од судот.
Второстепениот суд делумно му ја уважи жалбата на Ѓоко Поповски и му ја намали казната на 4 години и 6 месеци, а во останатиот дел првостепената одлука ја потврди.
За Гордана Јанкулоска за „Тенк“ е издвоена во друга постапка и пресудата за неа, под обвинение дека ја злоупотребила службената положба и го натерала Поповски да го намести тендерот за „мерцедесот“ што го посакал Груевски, ќе биде изречена на 8 октомври.
Daily news
Бизнисменот Минчо Јорданов треба да сведочи дали бил уценет со пари во шпионската афера

Бизнисменот Минчо Јорданов утрово во кривичниот суд е повикан да сведочи во предметот што го презеде специјалното јавно обвинителство под кодно име „Шпион“.
Обвинетите Миќо Наскоски, Зоран Божиновски и Марјан Маџовски, како што рече на минатото рочиште обвинителката Елизабета Јосифовска, со цел да се стекнат со противправна имотна корист, му се заканиле на бизнисменот Минчо Јорданов дека ќе објават податоци за наводна криминална приватизација и откуп на акциите во АД „Бетон“ и на други негови фирми. Во намерата не успеале, а Јорданов не ги исплатил парите.
„Обвинетиот Александар Диневски прибавувал податоци со степен на државна тајна, а потоа ги доставувал или директно на странските разузнавачки служби или му ги давал на обвинетиот Марјан Ефремов, кој ја формирал групата за уцени, изнуди и шпионажа и ја координирал од 2009 до 2013 година, регрутирајќи нови членови во мрежата. Со обвинетиот Мирослав Зафировски од УБК прибирале податоци за луѓе од ЦИА присутни во Македонија и за штаб на ЦИА во Ирак. Тие прибирале и податоци за организациската поставеност на УБК“, рече Јосифовска за „Шпион“, кое СЈО врз база на нови прислушувани разговори го презеде од Обвинителството за гонење организиран криминал и корупција.
Ефремов, според обвинението, групата за изнуда и тргување со тајни информации од безбедносните служби на Македонија ја направил во 2009 година и, како што тврди обвинителството, тој е мозокот на целата операција. Информациите им ги продавале на Кост Н. од грчката разузнавачка служба, Петар Н. и Јуриј Н. од унгарската и на други лица од странски разузнавачки служби.
Секој од обвинетите, зависно од тоа во која институција работел, снимал службени документи, кои потоа им ги продавал на грчката, руската, унгарската и српската разузнавачка служба. Обвинети во овој случај се и тогашниот шеф на Кабинетот на претседателот на Собранието, Трајко Вељаноски, генералот Горан Стојков, Миќо Насковски, Ѓорѓи Хаџимицев, Цветан Дамјановски (заедно со други нивни колеги од МВР, УБК, АР и Военото разузнавање, кои дел се веќе осудени) и Зоран Божиновски, кој во групата имал улога ако уценуваните не дадат пари, тој да ги објавува, како што вели обвинителката, во порталот „Буревесник“ или во други медиуми во кои работел. Божиновски е обвинет за злосторничко здружување, шпионажа и уцена.
Обвинетите не се чувствуваат виновни, а тврдат и дека целиот процес е монтиран. Во предметот првично беа опфатени 19 лица, од кои неколкумина ја одлежаа затворската казна. Предметот го суди судијата Владимир Туфегџиќ. На конференциска врска треба да сведочи и Драган Даравелски, кој, според обвинението, исто така бил уценуван од обвинетите.