Почнува инклузивниот детски фестивал „Креираме заедно“

„Скопје филм фестивал“ ја започнува новата инклузивна Детската филмска програма „Креираме заедно“, која ќе почне утревечер (петок,21 април), во 19.30. часот, во „Кинотеката на Македонија“.

Фестивалот во партнерство со Здружението за поддршка на деца и млади со различности „Сината птица“ од Скопје, годинава, преку програмата „Креираме заедно“, за првпат во конципирањето на фестивалската програма  ги вклучува и учениците со и без попреченост од  осум инклузивни училишта од Скопје, Тетово и Струмица.

Проектот  се имплементира со поддршка од Европската Унија, како дел  од програмата „Заштита на децата од насилство и унапредување на социјалната инклузија на децата со попреченост во Западен Балкан и Турција“, а е кофинансиран и спроведен од страна на УНИЦЕФ.

На 21 април, во „Кинотеката на Македонија“ ќе бидат прикажани завршните продукти од  работилниците за фотографија, видеозапис и плакат за детската програма . Во фоајето на „Кинотеката  ќе бидат изложени фотографиите и цртежите што ги изработија учениците, а по свеченото отворање, ќе бидат  прикажани нивните видеозаписи и дел од филмската програма.

Проектот „Креираме задено“ се имплементираше  во инклузивни училишта во Скопје, Тетово и Струмица  каде беа одржани работилници за фотографија, видеозапис и работилница за плакат, како и обуки за детски права. Во  нив учествуваа вкупно 86 ученици на возраст од 9 до 14 години кои во духот на самозастапување, преку визуелни алатки, говореа за себе и својот свет.

Работилниците ги водеа уметниците: Ване Костуранов (плакат), Наташа Гелевска (фотографија) и Јане Алтипармаков (видеозапис).

Детската филмска програма на „Скопје филм фестивал“ ќе понуди осум куси детски филмови кои уриваат  редица табуа и стереотипи за луѓето со попреченост  и отвораат  теми за размислување.   Филмовите се синхронизирани на македонски јазик  и се со адаптиран  превод  за лицата со оштетен слух.

По филмската програма ќе следи дебата на тема „Креативноста – прозорец кон светот на различностите“.

Програмата  „Креираме заедно“ продолжува и на 22 април, во Кинотека, со почеток во 19.30 часот. Влезот за двете вечери е слободен. крај/мф