Се чисти Дабничкиот Канал

Се чисти Дабничкиот Канал, кој поминува низ ромската населба Тризла во Прилеп. Каналот ќе се чисти од секаков вид нечистотија во должина од 1,5 км, и тоа од населбата Тризла па сè до неговиот влив во Градската Река кај типската населба.

„Каналот редовно се чисти на секои 2 години и во оваа пригода повторно би сакал да упатам апел до населението што живее во Тризла да не фрла отпадоци и шут во каналот бидејќи доаѓа до негово затнување и при поголеми поројни дождови се создаваат проблеми. Со ова чистење се спречува создавањето поплави во овој дел на градот кога ќе има силни дождови. Исто така, чистењето ќе придонесе и за зачувување на животната средина“, изјави градоначалникот на Прилеп, Марјан Ристески.

Редовното чистење на каналот и на речното корито на Градска Река е во координација со водостопанството „Прилепско Поле“, претпријатие што ги чисти и каналите во околината на Прилеп.